DILI, STLTIMORLESTE.com – Diretora Ezekutivu Organizasaun Arcoiris, Bela Galhos hatete, deklarasaun Prezidente Autoridade Munisipiu Aileu hasoru inan feto ho inisial AMA nee hanesan deklarasaun mane baratu.
Diretora Ezekutivu Organizasaun Arcoiris, Bela Galhos hatoo kestaun nee ba jornalista sira iha uma duut Palasiu Prezidensial Nicolau Lobato, Bairo Pite, Sabadu (18/07/2026).
Nia hatete, deklarasaun husi Prezidente Autoridade Munisipiu Aileu JBS hasoru inan feto Alda Maria Alves, deklarasaun hanesan mane baratu.
Bela Galhos hatete, modelu ema boot Timor nian fasil los halo deklarasaun hodi hatun feto, no husi deklarasaun hatete katak feto maluk Alda ema hotu konhese, Alda oan 3, ho mane diferente, nia nee tama tan. Liafuan hirak nee simplismente mai husi modelu mane baratu, organiza deit kalsa laran mos labele.
Diretora Bela hatete, tempu ida luta ba kestaun emasipasaun feto jender respeita maibe iha parte seluk haree ema neebe kaer kargu hatun feto sei makaas, liu liu ema sira neebe mai husi kaer kargu, ida nee labele.
Feto sofre ba rai ida nee laos husi okupador sira, oras nee okupador sira laiha ona Timor Leste, maibe inan barak sei sofre hanesan feto maluk Alda neebe sofre husi Prezidente Autoridade Munisipiu Aileu neebe kaer kargu, no uza kargu hodi abuzu poder hanoin osan US$ 5.000 bele sosa ema nia dignidade. No husi Bosco nia deklarasaun katak presiza teste DNA maibe ida nee presiza ba sosa iha rai liur maibe la hatene katak senhor nee kala riku los karik neebe hanoin sosa feto hanesan sosa ropa iha merkadu.
“Oan neebe nia ba mete hotu nia deklara katak nia selu nia haree depois dehan sei test raan karik laos nia oan sei akuza fali Alda sei selu fali osan ho nama baik, o hatun tiha ona ema ida o fakar ema nia vida privadu iha publiku, lo-loos Alda mos bele akuza nia, hau nia vida privadu mete saida nee ho urusan saida. Maibe koalia hanesan mane baratu, senhor Bosco hau la dehan Prezidente Autoridade Munisipiu Aileu, maibe Bosco mane baratu laiha integridade no moral laiha, nia koalia haluha tiha katak Alda nee la monu husi kalohan mai, la sae husi tasi mai, Alda mai husi familia ida no mais importante tanba iha oan, no o halo kanek inan ida o halo kanek mos oan no o hakanek feto lubuk boot,” katak nia.
Nia hatete, nia kondena makaas aktu husi PAM Aileu nia atitude hasoru feto maluk Alda nee, no hahalok hanesan mane Bosco barak mos iha rai ida nee hodi uza poder halo terus feto sira.
Feto Potensia nee hatete, Bosco baratu demais, ema modelu nunee barak tebes hamahon aan iha partidu laran. Iha fatin, partidu bele boot, ho lider nasional, maibe militantes balun neebe tuir estraga tudo, ezemplu mak hanesan Bosco nee.
Nia hatutanz deklarasaun hirak neebe Prezidente Autoridade Aileu fo sai, konsidera la respeita feto, no husu organizasaun feto atu lori kazu nee ba oin.
Aleinde nee Vítima Alda Maria Alves foin lalais denunsia ba publika konaba JBS (atual PAM-A) neebe halai ses husi responsabilidade, entretantu JBS deklara la halai ses maibe bazeia ba akordu família rua no ezije teste DNA (Deoxyribonucleic Acid) ba bebe iha inan nia kabun laran.
vitima hatete, hanesan feto neebe vítima dala hira ona inklui kolega feto seluk neebe vitima ba aktus imoral husi João Bosco dos Santos atual Prezidente Autoridade Munisipiu Aileu, maibe sira hola dalan ho rezolve nonok.
Nunee mos deklarasaun husi PAM-Aileu JBS deklara nia parte la halai ses husi responsabilidade tanba iha karta deklarasaun neebe parte rua asina iha momentu neeba katak laiha kompromisu ba feen no laen.
”Hau la aseita dehan hau halai ses husi responsabilidade (JBS laos hanesan PAM-A), hau responsabiliza bazeia ba akordu ida nee katak familia rua ho ami nain rua laiha kompromissiu atu too sai uma kain, ami rua sei kuidadu ba labarik no fo US$ 5.000 hodi tau matan ba bebe la nesesariamente depende ba mane no ami konkorda tau matan ba eskola. Maske labarik nee laos hau-nian, hau ba hanesan Joâo Bosco laos hanesan PAM-Aileu, ami rua aseita malu, deklarasaun nee ami hotu asina, oan nee sei lori ba teste DNA, se hau nia oan hau lori mai trata nia ba eskola too boot. Se teste DNA mak laos hau nia oan, hau sei ezije no selu naran diak ho duas vezes, hau prontu responsabiloza,” Katak PAM Aileu.
(eme)
