DILI, STLTIMORLESTE.com – Relasiona ho kalendariu husi Ministeriu Edukasaun nian iha Segunda (13/07/2026) estudante sira hahu ezame segundu periodu nian, tanba nee husu ba inan aman sira atu akompanha oan sira estuda iha uma ho diak.
Inan ho aman sira tenke akompana oan sira nia estuda iha uma, atu nunee bele lori rejutadu neebe inan aman sira hakarak iha iha izame mai nee. Akompana no fo atensaun ba oan sira, haruka sira estuda ho didiak materia sira neebe mak manorin nain fo ona ba sira durante prosesu aprendizajen.
Tuir Professor husi Escola Katoliko Sao Jose Operario, Silverio da Costa hatete, izame ba segundu period nian nee besik ona, neebe sei halao iha Segunda. Husu ba inan ho aman sira atu akompana no fo atensaun ba oan sira iha uma, atu estuda didiak materia husi kada disiplina neebe mak sira simu husi professor sira. Presiza estuda ho didiak, atu nunee sira bele prense pontus izame nee ho diak.
“Hanesan manorin nain nomos inan aman nia fatin bainhira oan sira mai iha eskola, hau husu ba inan aman sira iha uma atu tau matan no akompana mos oan sira para bele estuda ho diak, atu nunee sira bele prense perguntas husi pontus neebe professor sira fo iha izame laran nee ho diak. Para nunee bainhira simu rejultadu bele lori kontenti ba estudante nomos ba inan aman sira,” dehan nia ba STL iha Balide, Kuarta (08/07/2026).
Nia hatutan, bainhira hakarak oan sira hetan rejultadu husi izame nian ho diak, importante mak inan aman sira mos tenke akompana oan sira estuda iha uma ho diak. Kontrola sira nomos fo atensaun atu sira seriu hodi estuda.
Nunee mos Koordenador EBF 12 de Outobru Tasi-Tolu, Fernando Bareto hatete, inan aman sira presiza tau matan ba oan sira hodi haruka sira estuda iha uma. Labele husik sira halimar deit, inan aman preokupa liu fali ho servisu. Depois too simu kaderneta mak inan foin hakfodak haree sira nia rejultadu hodi koalia oioin, tanba durante la akompana oan sira nia prosesu aprendizajen iha eskola, no fila ba uma la haree tuir fali kadernu neebe sira lori mai eskola.
“Inan aman tenke kontrola oan sira nia livru lor-loron, atu nunee bele hatene tuir oan sira nia prezensa no prosesu aprendizajen iha eskola. Atu nunee too tempu simu kaderneta inan aman labele hakfodak haree rejultadu iha kaderneta, hodi labele mosu problema entre inan aman no parte eskola,” dehan nia.
Nia hatutan, besik izame ona inan aman tenke akompana oan sira eskola iha uma ho diak.
(dom)
