ATAMBUA, STLTIMORLESTE.com – Primeiru Ministru (PM), Kay Rala Xanana Gusmão halao vizita trabalhu ba Rejiaun Administrativa Espesiál Oekusi Ambeno (RAEOA).
Tuir nota komunikadu neebe STL asesu husi media Gabinete Primeiru Ministru iha Segunda (17/02/2025) sita katak, iha Fronteira Mota-Ain, Silawan, Tasifeto Timur, Nusa Tenggara Timur (NTT), PM Xanana simu direita husi Komandante Resor Militár (Danrem) 161 Wira Sakti Kupang, Brigadeiru Jenerál (Brigjen) Tentara Nasionál Indonsia (TNI), João Xavier Barreto Nunes akompanha husi Xefe Postu Integradu Fronteira Indonezia iha Mota-Ain.
PM Xanana hetan konvite hodi hemu kafe hamutuk iha Postu Integradu Fronteira Mota-Ain, no durante minutu 40 nia laran konversa ho amigável tebes molok hakat liu bá RAEOA.
Koalia mós kona-bá oinsa planu estabelesimentu kooperasaun, linha koordenasaun defeza ho seguransa, solusaun ba kestaun Fronteira rai maran inklui amizade iha Fronteira rai rua nian iha futuru.
João Xavier Barreto Nunes garante ba Primeiru Ministru, Kay Rala Xanana Gusmão katak, situasaun no linha koordenasaun defeza no seguransa iha Fronteira sei kontinua diak liu tan, tanba misaun husi servisu seguransa nian iha Fronteira atu lori dame no moris hakmatek bá povu nasaun rua nian.
João Xavier Barreto Nunes mós kompromete de’it atu halao misaun dame iha Fronteira, no kestaun sira liga ho disputa rai maran nee desizaun polítika entre líder masimu nasaun rua nian atu buka soluasaun hamutuk.
(alb)
