DILI, STLTIMORLESTE.com – Ministeriu Publiku (MP) iha nia alegasaun ba krimi Violensia Domestika ho Forma Ofensa Integridade Fizika Simples, solisita ba iha Tribunal Singular atu kondena arguidu ho inisial BGL ho pena multa.
Prokurador Napoliao da Silva liu husi alegasaun iha loron Segunda nee deklara katak, arguidu konfesa ba faktus halo duni agresaun hasoru lezada IAP, tanba nee Prokurador mantein ho akuzasaun neebe iha, hodi solisita ba iha Tribunal atu aplika pena multa ba arguidu US$ 60.
Enkuantu husi parte defeza arguidu nian, Manuel Expostu aseita ho pedidu Ministeriu Publiku nian, husu Tribunal atu aplika pena multa ba arguidu.
Rona tiha deklarasaun nee, Tribunal adia ba loron seluk hodi rona desizaun.
Tuir akuzasaun neebe iha katak, iha loron 27 fulan Maiu tinan 2024 haleu oras tuku 6:00 loraik, iha Aimutin Dili, arguidu lori liman buti ofendida nia kakorok no tilun hodi rezulta tilun hun bubu.
Konsekuensia direita husi arguidu nia hahalok, ofendida hetan bubu iha tilun hun.
Ofendida ba halo tratamentu saude iha PRADET. Kauza husi problema nee, tanba ofendida husu ba arguidu dehan oinsa ita boot nia responsabilidade ba labarik ho hau, ofendida koalia repete nafatin lia fuan hanesan.
Arguidu halo ho forma livre, deliberada no konsientemente, hatene katak lori liman buti ofendida nia kakorok no tilun hun rezulta bubu, nuudar meiu neebe aptu hodi hamosu ofensa ba lezada nia isin lolon no saude.
Tanba nee, konstitui arguidu nuudar autor material ho forma konsumadu ba pratika konkursu krimi Ofensa Integridade Fizika Simples ho forma Violensia Domestika ida previstu no punidu tuir artigu 145 no lei kontra violensia domestika numeru 07/2010.
Audensia julgamentu nee prezide husi Juiz Singular Ivan Suritai, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku Manuel Exposto.
(ter)
