DILI, STLTIMORLESTE.com – Prezidente Movimentu Reafirmasaun Reformasaun Nasional (MORENA), César Valente konsidera politika Governu nian liu husi Sekretariu Estadu Asuntu Toponima no Organizasaun Urbana (SEATOU), neebe sobu komunidade sira nia uma iha sidade Díli laran nuudar asaun ida neebe haterus povu, tanba dezenvolvimentu nee lao sem Master Plan (Planu Boot) neebe klaru.
Prezidente MORENA nee deklara katak, nasaun neebe lao diak no dezenvolve an ho loloos, tente tau interese no domin ba nia povu nuudar prioridade boot, hodi nunee bele organiza sira nia hela fatin ho dignu no ho planu adekuadu.
“Nasaun neebe lao diak, buat neebe primeiru liu mak tenke hadomi nia ema hodi organiza povu nia hela fatin ho dignu no ho planu neebe adekuadu, laos haterus povu hodi haree deit ba asaun sobu nian,” dehan César Valente ba STL, bainhira dada lia ho STL, iha Díli, Kuarta (08/07/2026).
Tuir Antigu membru F-FDTL no Antigu Deputadu Bankada CNRT nee hatete, too agora parte MORENA no mos komunidade neebe sai vítima ba sobu uma seidauk asesu dezenhu ka planu jeral sidade kapital nian hosi parte SEATOU. Kestaun nee foti preokupasaun boot konaba transparensia no mos destinu fatin hela nian ba oin hosi povu kbiit laek sira.
Tan nee, César Valente husu no ezije ba Governu, partikularmente SEATOU, atu foti fali pasu hodi hatudu transparensia ho lansa Master Plan (Planu Boot) reordenamentu sidade nian ba publiku, hodi nunee dezenvolvimentu kapital labele lori fali terus no todan ba komunidade sira.
Iha parte ketak, Akademista UNPAZ, Hélder da Silva mos fo hanoin katak dezenvolvimentu urbanizasaun sidade nian tenke lao tuir kriteiru legal no bazeia duni ba planu detalhu nee inklusivu. Tuir na reordenamentu sidade kapital laos deit konaba fiziku, maibe tenke konsideira mos impaktu sosial no ekonomiku hodi nunee labele kria kiak foun iha rai laran.
“Hau hanoin atu moderniza sidade Díli, Governu tenke kordena diak ho sosidade sivil no komunidade afetadu sira, hodi nunee prosesu foti desizaun labele hamosu instabilidade sosial, msibe bele fo garante katak povu hotu sidade nee nian bele moris hakmatek no seguru iha sira nia rain,” dehan nia.
Etretantu sidadaun ida neebe sai mos vítima ba eviksaun ka sobu uma nee, Daniel Soares, hatoo nia lian tanis no triste tebes, tanba la hatene ona atu lori nia familia ba neebe.
“Ami labele kontra Governu, maibe labele duni sai ami hanesan nee laho fuan no laho hatudu fatin foun mai Ami. Labarik sira atu ba eskola mos susar ona, no ami lakon hotu ona mahon atu hela,” dehan Daniel ho lian triste.
(car)
