BAUKAU, STLTIMORLESTE.com – Sentru Lojistika Nasional (CLN-sigla português) Baukau seidauk lori foos saka kilograma 25 ho folin US$ 12.00 faan ba komunidade sira iha Suku Ossohuna, Postu Administrativu Baguia, Munisipiu Baukau.
Diresaun CLN mak esperansa povu rural nian, tanba mai ho politika atu faan foos folin US$ 12.00 kada saka kilograma 25 ba komunidade iha nivel Suku tuir objetivu atu halo intervensaun ba folin fos hakmaan komunidade sira neebe menus rendimentu.
“Koalia kona-ba subsidiu foos neebe mak Estadu faan ba komunidade parte neeba seidauk too iha neeba,” Xefe Suku Ossohuna, Paulo dos Reis Piedade ba STL iha Vila Antiga, Baukau Tersa (28/04/2026).
Nia sublina, parte CLN Baukau seidauk lori fos refere hodi ba komunidade sira iha Suku refere, tanba momentu situasaun difisil iha tinan 2021 bainhira folin fos iha merkadu kada saka kilograma 25 atinji US$ 17.00, parte Suku diriji proposta ba parte CLN, maibe fos refere la too iha komunidade.
Nia fundamenta, atual folin nesesidade bazika iha Suku Ossohuna hahu mudansa, hanesan fos kilograma 25 marka Globus, Tali Merah no fos seluk tan neebe antes nee kada saka US$ 14.00, maibe aumenta ona ba US$ 15.00 kada saka, iha neebe atual impaktu tebes ba komunidade rendimentu laek sira iha Suku refere.
“Rekomenda karik fos ida Estadu nian neebe baratu bele too lalais iha ami nia Suku neeba hodi nunee ami nia komunidade bele augueta hola,” Paulo dos Reis Piedade sujere.
Liga asuntu nee, STL tenta komfirma responsabilidade armajen CLN rejional Baukau, maibe laiha fatin atu fo komentariu.
Entertantu tuir nota informativu neebe STL asesu, Sentru Lojistika Nasional (CLN-sigla português), harii iha 2015 bazeia ba dekretu lei nu 26/2014 Setembru, nudar orgaun admistrasaun indireita estadu nian neebe tutela ba Ministeriu Koordenador do Assuntos Ekonomikos tuir vizaun, garantia soberania alimentar nesesidade bazika ba lojistika nasional no atu garantia soberania alimentar nesesidade baziku, material konstrusaun, bens servisu, logistika ba povu Timor-Leste nia sustentavel iha futuru.
No misaun atu hatan ba nesesidade lojistikas Estadu nian, hodi halao ho efikasia iha operasoens abastesimentu publiku no operasaun intervensaun integrada estadu nian iha nivel regulasaun presu bens ezensias alimentares, konstrusaun no obras publikas kompostu alinha 7.
Mak hanesan, CLN mak responde nesesidade lojistika Estadu Timor-Leste, kampanha no senbiliza hodi insentiva promove no proteza produto lokal, sosa no prosesamentu inklui asegura rezerva estok rejional no nasional, akizasaun bens ensensias no distribuisaun ba populasaun, komersializasaun produto lokal hodi aumenta reseitas ba Estadu Timor-Leste, intervensaun merkadu normaliza presu no estabelesimentu publiku, implementa fortifikasaun aihan no nutrisaun ba Timor Leste.
(tom)
