BAUCAU, STLTIMORLESTE.com – Komisaun Nasional Eleisaun (CNE – sigla português) sei koloka nia ofisial hodi fo supervizaun ba servisu Sekretariadu Tekniku Administrasaun Eleitoral (STAE) nian iha nivel Postu Administrativu sira.
Diretor Sede CNE Munisipiu Baucau, Esmeraldo Damião Belo informa, ofisial neebe CNE rekruta no destaka iha nivel Postu Administrativu sira, nuudar matan tilun ba CNE nomos sai matan tilun ba inan aman no idozu sira neebe hela iha area remotas. Tanba nee, CNE inisia ona formasaun ba ofisial sira atu fo supervizaun ba servisu tratamentu kartaun eleitoral husi semi biometriku ba biometriku, neebe sei halao husi Sekretariadu Tekniku Administrasaun Eleitoral (STAE) nian iha nivel Postu Administrativu sira.
“Sira atu nee atu supervizaun ba operador sistema sira husi STAE nian neebe mak halao nia knaar iha nivel Postu. Tanba nee formasaun ida nee materia liga liu ba oinsa mak CNE garante supervizaun durante prosesu REABD nee rasik,” hateten Esmeraldo Damião Belo ba jornalista sira hafoin remata sesaun abertura formasaun ba nia ofisial sira iha fatin CNE Vila Nova Baucau, Tersa (07/07/2026).
Nia esplika, REABD mak prosesu inisiu rejistu ba eleitores foun sira nomos ba eleitores tuan sira neebe atu atualiza hikas nia kartaun eleitoral husi semi biometriku ba biometriku, neebe sei atende husi STAE iha nivel Postu.
Nia sublina, formasaun nee nuudar pasu preparativu CNE nian no hein orariu sertu husi STAE bainhira halao ona nia servisu resensiamentu eleitores biometriku iha Postu, CNE sei akompanha nia servisu tomak too remata.
Tanba prosesu READB no supervizaun mak nuudar pasu atu halo preparativu ba eleisaun tolu hanesan eleisaun Prezidensial, Munisipal no Parlamentar neebe sei akontese iha tinan 2027.
“Supervizaun ida nee importante, tanba eleisaun sira neebe sei mai ita prezisa dadus neebe akuradu hodi nunee ita partisipa festa demokrasia neebe sei mai,” Esmeraldo akresenta.
Nia komenta, prezensa ofisial CNE nian akompanha servisu STAE nian iha nivel Postu sei enkoraja sidadaun sira neebe idade too ona 17 ba leten atu partisipa iha atendimentu STAE nian. Tanba eleisaun sira neebe sei mai prezisa dadus neebe akuradu no klaru.
Nia sublina, seluk mak prezensa ofisial CNE nian iha terrenu atu haree no monitoriza mos ba eleitores neebe seidauk atualiza nia kartaun eleitoral husi semi biometriku ba biometriku.
“Husi kartaun eleitoral semi biometriku mak seidauk muda mai biometriku, entaun CNE nia ema sira agora daudaun tuir formasaun ba iha neeba relata fali mai iha nee ita prepara ba edukasaun sivika,” Esmeraldo informa.
Iha fatin hanesan, ofisial CNE destakadu Postu Administrativu Baguia, Silas Amaral konsidera, formasaun refere importante no sei aumenta pesoal ofisial sira nia koinhesementu atu garante supervizaun ba servisu STAE nian iha nivel Postu ho diak.
“Materia neebe formador sira fo bele aumenta ami nia kapasidade para halo supervizaun tuir regras no lei orgaun resensiamentu eleitoral nian,” Silas hateten.
Ofisial CNE destakadu Postu Baguia nee katak, eleitores iha baze maioria seidauk iha koinhesementu kona-ba atualiza no resensiamentu eleitoral, tanba maioria sei utiliza kartaun eleitoral semi biometriku, nunee liu husi formasaun ba ofisial CNE nian atu halo supervizaun ba servisu STAE nian iha nivel Postu, parte ofisial CNE mos sei foku ba problema eleitores tuan neebe seidauk atualiza no resensiamentu nia kartaun eleitoral, atu eleitores sira hakbesik aan iha fatin atendimentu hodi CNE hamutuk ho STAE halo preparasaun diak ba eleisaun sira neebe sei akontese iha tinan 2027.
Entretantu formasaun neebe CNE fasilita ba nia ofisial sira loron ida iha salaun CNE Munisipiu Baucau ho total ofisial neebe partisipa nain 8 husi Postu Administrativu 8 iha Munisipiu Baucau.
(tom)
