CNRT Husu PR Labele Keixa Deit SEATOU, Maibe Keixa Mos Roo Haksolok

Visi Diretor Asosiasaun HAK, Antonino de Limas. (Foto STL/Emerenciana Pinto)

DILI, STLTIMORLESTE.com – Deputadu husi Bankada CNRT husu Prezidente Republika (PR) labele keixa deit SEATOU, maibe keixa mos kazu roo Haksolok, ho ida nee sosiedade sivil husu ba Parlamentu Nasional mos bele hatoo keixa ba Prokurador Jeral Republika, laos hein deit PR.

Visi Diretor HAK, Antonino de Limas hatete, deklarasaun husi Deputada husi Partidu CNRT nee, stetmentu politiku salva aan husi buat ida hatete fali buat seluk atu taka aan.

“Ba ita, saida mak Prezidente Republika halo nee kompetensia ninia, no keixa SEATOU nee tanba Prezidente haree iha violasaun, Governu halo violasaun ba direitu sidadaun nia, tanba nee Prezidente hatoo kazu nee ba Ministeriu Publiku, nee laos Prezidente deit maibe PDHJ mos halo ida nee, tanba nee mak Deputada CNRT husu fali kestaun roo Haksolok nee lo-loos, deputadu sira eziji ba KAK tanba kazu nee iha KAK nia liman,” dehan Antonino ba jornalista sira iha knaar fatin Farol, Dili, Kinta (23/01/2025).

Nia hatutan, kazu roo Haksolok Deputadu sira ezije ba KAK, tanba nee ligadu ho osan estadu nia, no relasiona ho roo Haksolok, Deputadu sira inklui Deputadu CNRT mos husu osan dala rua, maibe ikus liu kuandu roo Haksolok la mai depois Governasaun ida uluk mos husu tan osan no ho promesa katak roo sei mai, maibe too agora la mai, ho kazu nee lo-loos Deputadu CNRT ezije ba KAK hodi halo servisu no Ministeriu Publiku halo servisu kontinua prosesu.

“PN ezije ba KAK no Ministeriu Publiku atu prosesu para bele rezolve problema ida nee no kona-ba SEATOU nia asaun sira nee, nee buat seluk, tanba eviksaun sira la tuir lei kona-ba despezu adminidtrativu, tanba SEATOU kontra lei neebe hatete kona-ba mekanizmu prosedur sira neebe Governu tenke halo, kontra ida nee mak Prezidente no PDHJ halo keixa,” katak nia.

Nunee mos Peskizador AJAR, Inocencio de Jesus Xavier hatutan, tanba sa tenke haruka deit Prezidente Republika, karik tanba Prezidente Republika halo asaun hasoru membru Governu.

“Hau hanoin deputada sira bele keixa roo Haksolok laos haruka deit Prezidente Republika, karik Prezidente Republika foti asaun hasoru imi nia membru Governu, asaun kriminal no partisipasaun ho buat neebe imi hatene imi mos partisipa ka, deputadu sira labele ezije deit, hau enkoraja deputada sira halo keixa satan segundu orgaun soberania sira bele keixa roo Haksolok nee,” katak nia.

Entretantu foin lalais Deputada husi Bankada CNRT liu husi Deputada, Cedeliza Faria husu Prezidente Republika, Jose Ramos Horta atu lori kazu roo Haksolok keixa ba iha Ministeriu Publiku, tanba Estadu gasta osan barak maibe too oras nee roo seidauk mai iha Timor Leste.

(eme)

Share it :

Leave a Reply

Your email address will not be published. Required fields are marked *