DILI, STLTIMORLESTE.com – Bankada CNRT iha Parlamentu Nasional (PN) preokupa ho projetu konstrusaun estrada husi Uatolari liga ba Laisorulai, Kelikai, neebe antes nee lansa ona fatuk dahuluk husi Ministru Obras Publikas (MOP) no Autoridade Munisipiu Vikeke iha tinan 2024, maibe too agora konstrusaun seidauk lao.
“Hau hakarak kolia kona-ba projetu konstrusaun estrada husi Uatolari liga ba Laisorulai, Kelika, neebe foin lalais nee Ministru Obras Publikas ho Autoridade Munisipiu Vikeke lansa tiha ona fatuk dahuluk, maibe too agora seidauk lao nee tanba saida,” hatete Deputadu Bankada CNRT, Anacleto Freitas liu husi plenaria PN, Tersa nee (11/02/2025).
Nia hatutan, Governu presiza aselera konstrusaun estrada nee, nunee ba oin bele fasilita populasaun sira neebe hela iha Uatolari no Laisorulai bele lori sira nia produtu lokal ba faan iha merkadu sira.
Entretantu, iha biban nee Deputadu Bankada CNRT nee mos kritika Ministru Obras Publikas neebe iha tinan kotuk sobu ona ponte Welolo iha Munisipiu Vikeke, maibe too agora seidauk halo konstrusaun foun.
Tanba nee nia husu ba Visi Ministru Asuntu Parlamentares, Aderito Hugo atu hatoo hela ba Ministeriu Obras Publikas para bele haree problema nee.
“Ami nia ponte ida Welolo nee Ministru Obras Publikas ba sobu tia iha tinan kotuk, maibe too agora ninia kontinuasaun la iha. Hau la hatene, orsida iha ministeriu sira nee halo falhansu hotu tiha ita dun hotu ba maun Xanana mak la halo,” hatete Deputadu nee.
Entretantu projetu konstrusaun estrada husi Uatulari too Laisorulai responsabiliza husi empreza Internasional Xina Shanghai, no konstrusaun ho kilometru 22, ho orsamentu hamutuk US$ 18,462,610.14, projetu referida ho duransaun kontratu hahu loron 18 Outubru 2024 no sei ramata iha loron 3 Abríl 2026.
(alb)
