DILI, STLTIMORLESTE.com – Parlamentu Nasional fatin atu diskute asuntu importante liga ho povu nia moris, se deputadu sira iha plenaria laran diskute malu too baku malu, Prezidente Parlamentu Nasional (PPN) sei bolu polisia hasai deputadu husi plenaria.
Kestaun nee hatoo husi Prezidente Parlamentu Nasional, Maria Fernanda Lay ba jornalista sira bainhira remata halo enkontru ho Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Kuarta (11/06/2025).
Prezidente Parlamentu Nasional, Maria Fernanda Lay hatete, Parlamentu Nasional fatin atu diskute kona-ba asuntu povu nia, tanba nee evita diskute malu, no husu labele tolok malu iha parlamentu laran nunee evita diskute asuntu ligadu ho intrese privadu.
“Hau hanoin JSMP supervijiona, hau uluk gosta lee sira nia relatoriu maibe hau laos profesora nein inan para atu hanorin deputadu sira, no hau sente katak husi Bankada CNRT iha deklarasaun politika iha fulan kotuk se hau la sala, hau mos sama atensaun hau husu para ita labele tolok malu, respeita malu iha parlamentu para evita ita atu diskute asuntu neebe ligadu ba ita nia intrese privadu, no hau hanoin dala barak hau mensiona povu selu ita mai para hodi diskute asuntu povu nia laos ita mai diskute malu ke Governasaun ida nee halo diak liu hau hanoin hanesan labarik.
Iha biban nee Prezidente Parlamentu Nasional, Maria Fernanda Lay hatete, deputadu sira hakarak tuku malu iha liur laos iha Parlamentu Nasional laran, tanba nee bainhira mosu asaun ruma PPN sei la fo autorizasaun.
“Neebe hau hatete ona tuku malu iha liur, se iha nee labele hau sei la fo oportunidade, bainhira mos la respeita malu hau sei hapara nia intervensaun durante umdia, tanba ami laiha regras para fo sansaun ba deputadu muitu embora iha lejisladora anterior senhor Prezidente Aniceto duni sai ami 21, mais ami bele husu atu bele diskute iha plenaria se iha intendimentu tudu plenaria o hakarak duni ami tanba ami rekursu tuir rejimentu haruka,” katak nia.
PPN hatete, deputadu sira neebe mak koalia la respeita malu Prezidente Parlamentu sei fo sansaun no mosu tuku malu PPN sei bolu polisia hodi duni sai deputadu sira husi plenaria.
“Deputadu sira neebe koalia la respeitu malu hau sei sansiona (sansaun) hodi bainhira halo ona ba deputadu Cinarai ho Deputadu Antoninho Bianco se hau la sala, hau hatete ita boot uza mikrofon sein autorizasaun mos hau sansiona, nee laos Parlamentu Nasional Timor deit mak halo, foin lalais hau ba Malazia hau aprende kuandu la respeita ona hau husu polisia atu lori sai deputadu malkriadu iha plenariu tanba inasetavel ita fo edukasaun sivika ida ke la diak ba ita nia populasaun, sim parlamentu servisu ita bele diskute deskorda mais labele insulta malu,” dehan PPN.
Nia husu ba deputadu sira atu respeita malu, tanba povu selu ba tuur iha uma fukun Parlamentu Nasional hodi diskute asuntu neebe importante, se tuku malu tolok malu hatudu ezemplu neebe la diak ba povu kiik sira.
(eme)
