DILI, STLTIMORLESTE.com – Tribunal Judisial Primera Instansia Dili halao prosesu primeiru interogatoriu ba arguidu ho inisial NM, tanba deskonfia ho kondisaun lanu lori katana ameasa nia tiun.
Arguidu lori mai iha Tribunal iha Kuarta (04/12/2024), no Ministeriu Publiku promove krime arma branka ba iha arguidu.
Tribunal halo tiha identifikasaun ba arguidu, ikus mai iha faze alegasaun Prokurador Ozorio De Deus husu Tribunal atu aplika medida Termo Indentidade Rezidensia (TIR) no Aprezentasaun Periodika (AP) ba arguidu.
Enkuantu husi parte Defeza Marsal Mascarinhas iha alegasaun aseita ho pedidu Ministeriu Publiku nian atu aplika medida rua ba arguidu.
Rona tiha alegasaun, Juiz Turnu Zulmira Auxiliadora deside iha desapisu ikus katak, aplika medida Aprezentasaun Periodika ba iha arguidu, atu hein prosesu investigasaun.
Tuir defeza husi arguidu nian, Defensor Publiku Marsal Mascarinhas katak, arguidu Tribunal aplika medida aprezentasaun periodika.
Nia hatutan, arguidu nee kondisaun lanu mak ba ameasa nia tiun, no taa rahun kadeira rua iha Bekora.
Prosesu primeiru interogatoriu nee prezide husi Juiz Turnu Zulmira Auxiladora, Ministeriu Publiku reprezenta husi Prokurador Ozorio de Deus, arguidu hetan asistensia legal husi Defensor Publiku, Marsal Mascarinhas.
(ter)
