DILI, STLTIMORLESTE.com – Relasiona ho informasaun balu neebe iha, deskonfia funsionariu balu iha Diresaun Munisipal Konservatoriu Servisu Rejistu Notariadu Munisipiu Dili sai broker ba sidadaun balu, husi parte Komisaun Anti Korrupsaun (KAK) nian sei buka tuir.
“Media sira mos presiza halo identifikasaun, rona hanesan nee buka tuir ami mos buka tuir, tanba nee mak ita sei tau baner iha Terras Propriedade no iha Rejistu Servisu Notariadu nian, iha hospital no fatin lubuk ida ita tau ona,” dehan Komisariu KAK, Rui Pereira ba jornalista sira iha salaun MSSI, Kaikoli, Dili, Kinta (23/01/2025).
Komisariu KAK nee hatutan, atu hotu-hotu servisu ho fuan ho laran servisu ba rai ida nee, osan neebe ita nia direitu ita nian, no osan neebe ema seluk nia direitu labele ba foti.
Iha fatin ketak, Ministru Justisa, Sergio Hornai dehan, nia parte orienta ona atu halo averiguasaun.
“Hau orienta ba iha Inspetor Jeral Auditoria atu halo daudaun averiguasaun, halo nafatin inspesaun, atu nunee bele hetan informasaun preleminar,” dehan MJ, Sergio.
(ter)