BAUKAU, STLTIMORLESTE.com – Ema deskonhesidu naok komunidade sira nia karau iha Postu Administrativu Uatulari, Munisipiu Vikeke, kuaze hela deit ruin no ulun, enkuantu naan isin no seluk tan kuaze lori lakon husi fatin karau kesi.
Komandante Komando Polisia Munisipiu Vikeke, Superintendente António Rego Fernandes informa, relasiona informasaun neebe daudaun espalha iha media sosial, kona-ba komunidade sira nia karau lakon, naok husi ema deskonhesidu, loos, tanba Komando Polisia Munisipiu simu ona keixa husi nain ba karau.
“Karau lakon iha parte Suku sira neebe pertense ba Uatulari nian ho tan Bikarin parte Lakluta nian, karau nee naan sira lori, karau ruin ulun sira husik komunidade mai keixa nee iha haat nee fatin keta ketak maibe parte Uatilari hotu,” hateten Komadante Komando Polisia Munisipiu Vikeke ba jornalista STL liu husi telefone, Sabadu (07/06/2025).
Nia sublina, komunidade neebe mai keixa ba karau haat neebe ema deskonhesidu naok iha tempu kalan kuaze foti karau isin sira no seluk tan, maibe hela deit mak ruin no ulun neebe nain hetan iha fatin karau.
Nia fundamenta, daudaun Komando Polisia Munisipiu Vikeke hamutuk ho nain karau kontinua buka tuir autor sira hodi submete ba prosesu investigasaun.
“Ita buka hela suspeitu sira para hatan sira nia asaun organiza naok, tanba karau sira nee kesi iha knua mak ba oho foti naan sira hela deit ruin,” António Rego Fernandes akresenta.
Entretantu daudaun Komando Polisia Munisipiu Vikeke mos esforsu liu husi pasa revista ba kareta sira iha tempu kalan liu-liu movimentu husi Vikeke ba Dili hodi prevene kazu naok refere.
(tom)
