DILI, STLTIMORLESTE.com – Direjente Eskola Sekundariu Jeral nu. 4 Setembru kestiona komunidade balun neebe halo atividades negosiu no kesi bibi iha areador eskola refere.
“Ida nee mak husi parte ME bandu, entaun ema sira nee bele sai ba iha liur, sira nee iha parte ida prejudika ensinu aprendizajen, tanba lori sira nian oan sira nee tama sai iha areador eskola nian, maibe situasaun mak hanesan nee ona, tanba ita nian komunidade rasik mos hela iha laran. Los duni katak ita nian komunidade sira nee halo atividades negosiu iha areador eskola nian, hanesan iha parte estrada ninia no iha parte eskola kotuk ninia, nee sira halo negosiu,” dehan Diretor ESJ nu. 4 Setembru Balide, Sergio A. da Cruz ba STL iha nia knaar fatin, Tersa nee (23/06/2026).
Nia dehan, komunidade hirak neebe mak halo negosiu nee, dala ruma sira soe lixu iha areador eskola nian, nunee mos kesi fali bibi iha areador eskola nian, liu-liu iha parte sala andar oin besik estrada boot ninia, tuir lo-loos nee labele, tanba areador eskola nee hanesan fatin neebe mak profesores sira atu halo ensinu aprendizajen ba estudantes sira.
“Los duni komunidade sira kesi bibi iha resintu eskola nian, ida nee husi parte ME liu husi Edukasaun Munisípiu Dili nian, depois ba iha PAM ninia, sira mos presiza haree asuntu ida nee, ho nunee bele evita ida nee, maibe realidade neebe mak iha, ita nian komunidade sira nafatin halo ida nee,” dehan nia.
Nia salienta, areador eskola nee fatin neebe halo prosesu aprendizajen ba estudantes sira, maibe ida nee kompetensia husi ME nian, oinsa mak haree asuntu ida nee, halo negosiu nee iha fatin rua, ida iha parte estrada boot ninia, besik portaun eskola nian no ida seluk mak iha parte eskola kotuk.
Iha sorin seluk Pedro de Jesus Maia hanesan estudante husi ESJ nu. 4 Setembru Balide hatete, los duni iha sira nian eskola komunidade sira faan sasan iha areador eskola nian, bainhira sira rekreu, estudantes sira atu sosa buat ruma, nee sira sosa husi komunidade neebe faan iha resintu eskola refere.
“Los duni iha ami nian eskola komunidade sira faan sasan iha areador eskola nian, bainhira sira rekreu, estudantes sira atu sosa buat ruma, nee sira sosa husi komunidade neebe faan iha resintu eskola refere,” nia deklara.
(jac)
