DILI, STLTIMORLESTE.com – Direfente husi Eskola Sekundariu Jeral nu. 4 Setembru Balide laiha kompetensia atu hasai komunidade hirak neebe mak daudaun nee hela iha areador eskola refere.
Lia hirak nee hatoo husi Diretor ESJ nu. 4 Setembru Balide, Sergio A. da Cruz ba STL, Kinta nee (06/08/2026).
“Konaba ita nian komunidade sira hela iha areador eskola nian nee ami sempre levanta hela deit, foin daudaun enkontru iha Suku Caicoli ho SEATOU ho terras levanta asuntu ida nee, maibe rezultadu mak hein hela too agora nee, husi ministeriu nian mos hatoo hela ba, maibe ninia rezultadu seidauk, direjente eskola nee laiha kompetensia ida neebe mak boot liu, nee duni ida nee husi parte Ministeriu Edukasaun nian,” nia dehan.
Nia dehan, nee duni nuudar direjente husi eskola ida nee laiha kompetensia, tanba mai para atu servisu, laos atu sai nain, tanba nain mak Ministeriu Edukasaun ho Terras Propriedade, ba asuntu nee rasik resposta husi Ministeriu Edukasaun nian katak, hein prosesu sei lao, xefe familia iha nain 6, maibe iha uma kain tolu, asuntu ida nee kuaze tinan hira nian laran.
“Asuntu ida nee hau rasik atu haluha tiha, tanba tinan barak ona ita nian komumidade sira nee hela iha areador eskola nian, nee duni ba asuntu ida nee kompetensia husi Ministeriu Edukasaun no Terras,” nia afirma.
Nia dehan, komunidade sira nee hela iha laran tinan barak ona, dala ruma ensinu aprendizajen lao hela maibe komunidade sira nee lao tama sai iha areador eskola nian, uza transporte halo movimentu tun sae iha resintu eskola.
Iha parte seluk, Superintendente Edukasaun Munisípiu Dili, Cesarina C. Guterres dehan, kona-ba okupantes sira iha areador eskola sira nee balun hamamuk ona fatin, nee iha nivel ensinu baziku nee kuaze hamamuk ona, maibe okupantes iha nibel ensinu sekundariu nee mak seidauk. Okupantes sira iha Eskola Ensinu Baziku Central (EBC) iha Munisipiu Dili kuaze hamamuk ona fatin, no iha ESG too agora seidauk hamamuk fatin.
“Ita nian okupantes husi eskola ensinu baziku sira neebe komunidade sira hela ba kuaze hamumuk hotu ona, maibe eskola ESG sira mak seidauk. ESG Kuaze seidauk sai, komunidade sira hela nafatin. Razaun seluk media bele konfirma ba Diretor Servisu Edukasaun Munisipiu Dili,” dehan Cesarina.
Entretantu, Diretor Servisu Edukasaun Munisípiu Dili, Sabino Pereira hatete, eskola 17 nee ida neebe, tanba ladun lembra didiak, tanba eskola 6 mak hasai ona okupantes sira nee lori ba sira nia hela fatin, uma 6 nee mak eskola 10 Dezembru, Bidau Akadiru-hun, EBC Sergio Viera de Melo, EBC Hera, EBF Bemori, EBC Esperansa da Patria.
(jac)
