DILI, STLTIMORLESTE.com – Ministeriu Edukasaun (ME) halo distribuisaun meza no kadeira ba ensinu sekundariu jeral, nee bazeia ba nesesidade husi eskola ida-idak nian.
Tuir Diretor Nasional Ensinu Sekundariu iha ME, Benjamin Gomes da Cruz Fernandes katak, karik too agora eskola neebe sei menus meza no kadeira, nee husu sira halo pedidu mai iha ministériu, ho nunee fo informasaun ba diresaun infraestrutura bele haree asuntu ida nee.
“Atu hatete katak, eskola hotu-hotu iha teritoriu, liu-liu ita nian eskola sekundariu sira, atu dehan menus los meza kadeira nee laiha, tanba sekundariu jeral nee hotu-hotu iha meza no kadeira, maibe iha parte balun neebe mak sei menus meza no kadeira, nee duni bainhira meza no kadeira iha ona mak Ministeriu Edukasaun sei distribui ba ita nian eskola hirak neebe mak sei menus,” afirma Benjamin ba STL iha salaun Ian Martin Balide, Sesta nee (12/06/2026).
Nia dehan, bainhira eskola sekundariu neebe sei menus meza no kadeira, ME sei halo distribuisaun bazeia ba nesesidade husi eskola idak-idak nian, ensinu sekundariu jeral nee hotu-hotu iha kadeira no meza, iha eskola ida rua mak menus, nee Ministeriu sei distribui ba eskola hodi bele kompleta iha eskola sira.
“Ami mos sei haree eskola balun meza kadeira barak liu, ami sei foti fali ba eskola neebe mak sei menus meza no kadeira, tanba nee mak Ministeriu laos iha informasaun katak, meza kadeira laiha iha sekundariu, nee informasaun la los,” nia komenta.
Iha fatin seluk, Diretor Servisu Edukasaun Munisípiu Bobonaro, Miguel Freitas hatete, Servisu Edukasaun Munisípiu Bobonaro nafatin halo identifikasaun fasilidade meza no kadeira iha eskola sira iha area remotas, sira direita ba iha EBC Samutabe, EBC Bedila ho Ensinu Sekundariu Jeral Kailako.
“Kona-ba livrus nee distribuisaun mai tiha ona, maibe sei falta iha eskola ida iha Atabae, eskola nee mak seidauk hetan livrus nee. Ami nian eskola ida mak iha sala 6, tanba kompanhia foin halo hotu, entaun meza kadeira seidauk iha, ensinu sekundariu ida nee mos meza kadeira laiha no ami nian eskola ida seluk mos sei menus meza kadeira. Ami kontinua identifika ita nian fasilidade iha eskola area remotas,” dehan nia.
Miguel hatutan, maibe sei iha eskola barak mak too agora sei menus meza no kadeira, identifika nee srvisu ekipa, hanesan husi inspetor eskolar, enjeneiru no husi parte edukasaun ninia, nee duni daudaun nee lao hela iha eskola sira.
“Ita tenke ba iha eskola sira, atu nunee ita bele identifika iha eskola neebe mak too agora sei menus meza kadeira, liu-liu ita nian eskola neebe iha area remotas sira, balun sei menus meza no kadeira ba ita nian estudantes sira,” dehan nia.
Nunee mos Superintendente Edukasaun Munisipiu Dili, Cesarina Correia Guterres hatete, kona-ba kondisaun infraestrutura iha ESJ 5 Maiu konstrusaun sala 8, maibe agora daudaun paradu hela. EBC Manleuana, uma tomak 1 iha sala 4 maibe ho kondisaun aat hotu. EBF Mota Ulun presiza halo konstrusaun ba sala de aula no eskola balun presiza meza no kadeira ba estudantes sira.
(jac)
