DILI, STLTIMORLESTE.com – Hahu loron 1-31 fulan Janeiru, Polisia Nasional Timor Leste (PNTL) liu husi Departamentu Nasional Tranzitu no Seguransa Rodoviária (DNTSR) rejistu kazu asidente hamutuk 179 no lakon vida nain 7.
“Kazu asidente ita konsege rejistu hamutuk 179, kazu nee ema lakon vida nain 7, kanek todan 37, kanek kmaan 235 pesoas,” dehan Komandante Tranzitu Seguransa Rodaviaria Nasionál, Superintendente Asistente Luis da Costa ba jornalista sira iha nia knaar fatin Komando Jeral PNTL, Dili, Tersa (11/2/2025).
Nia dehan, husi kazu sira nee iha finalidade mak ida, prosesu iha Tribunal iha lima, nomos sei iha prosesu nia laran mak 96 kazu.
“Kauza husi asidente nee tuir ami nia analiza estatístika nee fator domina nee mak fator umanu 90%, fator dalan 5%, fator natureza 5%,” nia esplika.
Iha fatin ketak, Kondutor Mikrolet 010, Francisco Xavier deklara, transporte barak iha sidade Dili, maibe asidente ladun, iha munisipiu kuaze semana ida nain 10 ba leten, tanba motorista sira neebe lori karreta ho motor ladun kontrola aan, hakarak halai ho vilosidade neebe makaas.
“Ita haree iha sidade Dili transporte publiku barak demais, maibe asidente ladun iha, mais ema viajen husi munisipiu ida ba munisipiu seluk nee ita haree ema barak lakon vida no kanek todan, tanba estrada diak depois trasporte ladun barak, entaun sira halai tuir sira nia hakarak, ikus bele hetan asidente balu kanek todan, balu mate fatin, tanba nee lori karreta ou motor nee ema idak-idak nia konsiensia deit,” nia afirma.
(jen)
