DILI, STLTIMORLESTE.com – Domin ba Jesus Kristu buras, ema idak-idak tenke haburas hahalok domin ba malu no moris tuir ukun Maromak nian ho konkretu.
Kestaun nee hatoo husi Padre Paul Kerans SVD ba STL Segunda (11/05/2026) hatete, Jesus hanorin ema oinsa moris iha dame, no bainhira ema nia domin ba Jesus buras ema idak idak presiza haburas nia hahalok iha domin no moris tuir Maromak nia ukun fuan sira.
Padre hatete refleksaun ou evanjelhu iha loron domin semana 5 paskoa João 14:15-21, Iha Evanjelhu Domingu nee nian, Jesus promete ba nia dixípulu sira Tulun nain ida neebe sei hamutuk nafatin ho sira, ida neebe sei ajuda no orienta sira.
Maibe atu Tulun-nain nee bele hamutuk ho sira, dixípulu sira tenke hatudu sira-nia domin ba Maromak hodi haklaken Nai nia hanorin no halo tuir Ninia ukun-fuan sira. Tanba nee, promesa Auxiliadora nian sei la kumpre se laho dixípulu sira nia obediensia no hahalok domin nian neebe konkretu.
“Fasil ba ita atu reklama katak ita hadomi Jesus, maibe ita hadomi duni Jesus ka lae? Ita dehan ita hadomi Jesus, maibe ita hili atu taka matan ba ema seluk neebe presiza ita nia tulun. Ka ita kontinua halo sala. Iha neebe mak asaun konkreta sira ita-nia domin nian ba Maromak? Atu ita-nia domin ba Jesus buras no fo fuan, ita tenke haburas ho hahalok domin nian neebe konkretu. Ita tenke fahe Jesus no sai Jesus moris ba ema seluk atu nunee liuhusi ita sira bele konese Jesus,” dehan Padre Paul.
Padre hatete ema presiza nakloke aan hodi tulun mos ema neebe presiza tulun, hodi haburas domin ba malu liu husi karidade no no tulun husi asaun.
“Bainhira ita halo buat sira-nee, ita simultaneamente permite Espíritu Santu atu mai ita no fo espasu ba Nia atu movimenta livremente iha ita-nia laran. Tan nee, ita halo buat neebe diak beibeik, no ida-nee laos tanba ita-nia hahalok rasik. Ita halo ida-nee tanba Espíritu Santu book ita atu halo ida nee.” Katak Padre.
Bibi atan kreda katolika nee dehan bainhira tulun ema neebe vuneravel ida nee premite esperitu santo atu hela hamutuk ida moris tomak, tanba nee Jesus husu ema ida-idak nafatin hatudu domin liu husi asaun konkreta iha vida tomak.
(eme)
