BAUKAU, STLTIMORLESTE.com – Komando Polisia Munisipiu Baukau identifika ona suspeitu inisial NL neebe oho nia alin Domingos Baptista, idade 61, iha Aldeia Bubuloma, Suku Saelari, Postu Administrativu Laga, Munisipiu Baukau.
Komadante Komando Polisia Munisipiu Baukau, Superintendente João Sancho Pires aprezenta, kazu akontese iha loron 09 Maiu tuku 02:00 meudia, tuir kronolojia mate bian Domingos Baptista kondisaun lanu ho dima ba asaltu nia alin, nunee NL halo auto defeza ba nia aan ho ain pedasuk baku dala tolu iha mate bian nia parte ulun, rezulta mate fatin.
“Nia motivu ita husu hela, maibe sira dehan katak nia alin nee lanu mak ba asaltu nia maun, ita orienta Eskuadra Laga foti mos nia indikasaun alin nee beibeik ona lanu ba problema ho nia maun, nia maun nee mos difisiensia hela defende aan baku mate nia alin,” Komadante Komando Polisia Munisipiu Baukau, Superintendente João Sancho Pires hateten ba jornalista sira iha nia knaar fatin Vila Nova Baukau, Tersa (12/05/2026).
Pires sublina, hafoin NL halo auto defeza hamate nia alin Domingos Baptista, NL rasik aprezenta aan ba Autoridade Suku hafoin halo kontaktu ba Polisia Eskuadra Laga hamutuk ho Polisia Investigasaun husi Komando Polisia Munisipiu Baukau too fatin akontesementu rekoilha informasaun no evidensia sira hanesan dima no ai pedasuk, inklui mos koordena ho parte familia atu submete mate bian nia mate isin ba autopsia, maibe familia rasik la aseita, tanba kestaun kultura.
Nunee parte Polisia halao ona nia servisu hanesan presta deklarasaun konkordansia ho familia relasiona la prosesa mate bian nia mate isin ba autopsia enkaixa ho evidensia sira aprezenta ba Ministeriu Publiku.
“Kazu nee ita rejistu ona ho Numeru Nuc 0048/26 BCSIC ohin ita entrega ona ba Ministeriu Publiku, tanba kazu nee fragante delitu suspeitu detein hela iha sela Baukau para bele prosesu,” Pires akresenta.
Entretantu iha loron 12 Maiu nee Komando Polisia Munisipiu Baukau liu husi Servisu Investigasaun Kriminal aprezenta ona kazu refere ho evidensia sira hanesan diman ida no ai dona ba Ministeriu Publiku Baukau atu prosesa.
(tom)
