AMBENO, STLTIMORLESTE.com – Diresaun Rejional Servisu Administrasaun Rekursu Humanu (DRSARH) Rejiaun Administrativa Espesial Oecusse-Ambeno (RAEOA), sei reforma funsionariu idade avansadu hamutuk 49. Husi total nee, barak liu husi Diresaun Rejional Servisu Edukasaun (DRE) ho Diresaun Rejional Servisu Saude (DRSS).
Informasaun nee hatoo husi Diretor Rejional Servisu Administrasaun no Rekursu Humanis (DRSARH), Domingos Punef ba STL iha Salaun Gabinete Prezidente Autoridade Oebau, Suku Costa, Postu Administrativu Pantemamasaar RAEOA, Segunda (13/07/2026).
“Iha oportunidade ida nee, ami agradese ba IX Governu nia politika, tinan nee liu husi DRSARH Oecusse-Ambeno, servisu hamutuk ho nasional, liu-liu Komisaun Funsaun Publika, Komisariu Portofolio Reforma, iha loron 16 Julhu 2026, sei halao Formasaun iha Rejiaun Administrativa Espesial Oecusse-Ambeno (RAEOA) liu-liu ba pensionista sira sei tuir formasaun oinsa priense dokumentus ba reforma nian neebe sei halao iha Oecusse durante loron ida, iha Oecusse-Ambeno neebe Mak organiza husi Komisaun Funsaun Publiku (KFP) ho DRSARH RAEOA,” Dehan Domingos Punef.
Nia dehan, formasaun nee sei halao iha loronn 16 fulan Julhu tinan 2026 ba funsionariu sira neebe idade besik tama ba reforma, signifika nia idade 59 too tinan 65, sira sei tuir treinamentu atu priense dokumentus reforma nian nomos sei atribui sertifikadu ba sira neebe tama ona idade reforma nuudar agradesimentu ba sira nia dedikasaun durante tinan naruk nia laran hodi halao serbisu makina estadu Timor Leste (TL) nian iha Oecusse.
“Ita halao treinamentu nee ba Funsionariu sira neebe idade besik reforma ona atu rona kriteria saida maka sira sei priense iha rekezitus reforma nian, durant halao knaar nuudar funsionariu publiku iha serbisu estadu nian, neebe sira ho idade 60 ona, tuir lei fo ona kompetensia ba sira atu reforma neebe sira sei hakarak halo serbisu, ida nee depende sira tanba idade reforma nian too 65, tanba nee estadu nafatin hein pedidu husi funsionariu sira neebe idade tama ba reforma,” haktuir nia.
Nia dehan, funsionariu neebe tama idade reforma, tenke kompleta dokumentus sira neebe estabelese ona husi KFP, sira iha Direitu ba osan pensaun nudar diretu sidadania ida neebe ezerse ona ninia knaar nuudar Funsionariu Publiku.
Antes nee, Diretor Serbisu Rejional Edukasaun, Vincencio Cono dehan profesores neebe idade besik tama ona ba reforma, tenke prepara dokumentus hodi priense dokumentus neebe prepara husi KFP atu nunee, bele prosesa pensaun sosial neebe durante nee kontribui liu husi Institutu Nasioanal Seguransa Sosial.
Iha fatin ketak, Maria Neno dehan, funsionariu publiku neebe idade abansadu ona nee, labele obriga aan ona atu serbisu, diak liu prepara dokumentus ruma neebe KFP presiza, atu hatama pedidu asesu pensaun sosial tuir rekezitus neebe governu kria ona.
“Hau hanoin, oras nee funsionariu Publiku neebe idade reforma ona, diak liu prepara dokumentus ona atu husu pedidu reforma tanba dadauk nee, estadu iha dekretu lei ida, fo rekonhesementu ba ita boot sira atu hetan pensaun sosial, uluk sedauk iha pensaun nee, funsionariu publiku neebe serbisu tinan naruk nia laran, sira fila ba sosiedade la iha pensaun, maibe ohin loron iha ona pensaun diak liu trata ona dokumentus nee, atu hetan direitu, nunee governu bele halo rekrutamentu foun atu kada instituisaun estadu iha re-generasi hodi kontinua obra estadu ba oin, tanba dadauk nee funsionariu kontratadu mos barak sedauk sai funsionariu publiku permanente.
(jos)
