AMBENO, STLTIMORLESTE.com – Diresaun Rejional Transporte no Komunikasaun (DRTK) iha Rejiaun Administrativa Espesial Oecusse-Ambeno (RAEOA) hahu husi fulan Janeiru too fulan Junhu 2026, hatama reseitas osan hamutuk US$ 143.254,97 ba kofre Estadu.
Informasaun nee hatoo husi Diretor Servisu Rejional Transporte no Komunikasaun, Rejiaun Administrativa Espesial Oecusse-Ambeno (RAEOA), Domingos de Almeida ba STL iha Salaun Gabinete Autoridade RAEOA Oebau, Suku Costa, Postu Administrativu Pantemakassar Oecusse, Kinta (02/07/2026).
“Ita nia reseitas neebe rekolha iha RAEOA, mai husi Fronteira nomos reseitas neebe rekolha husi selu taxa husi transporte publiku hanesan Angguna, Microlet, tum-tum, kareta boot sira no motor ho total osan hamutuk US$ 114.854,50,” dehan Diretor DRTK RAEOA, Domingos Almeida.
Nia haktuir tan katak, husi reseitas neebe mensiona iha leten, aumenta reseitas iha fulan Maiu mai husi Fronteira hamutuk US$ 260, reseitas fulan Junhu hamutuk 2.930, reseitas neebe mai husi Portu Internasional Iwao Kitahara Mahata Suku Kutete hamutuk US$ 24.220,47, tanba nee reseitas neebe rekolha durante fulan 6 nia laran soma hamutuk maka US$ 143.254,97.
Iha fatin ketak, Domingos Obe nuudar operador Tum-tum konfesa katak, sira kada fulan 6, sempre kumpri desizaun governu, selu taxa ba Estadu.
“Kada fulan 6, ami nuudar operador tum-tum iha Oecusse, sempre selu taxa ba estadu liu husi renova dokumentus, ami nia obrigasaun, tanba kada loron kasa osan uza estrada publiku, tanba nee nuudar sidadaun ida tenke selu taxa ba estadu, nunee governu jere hadia estrada sira iha nasaun Timor Leste (TL),” dehan Domingos Obe.
Nunee mos Gabriel Sila nuudar motorista Angguna iha Oecusse konfesa katak, kada fulan 6, sempre kumpri deveres hodi kontribui reseitas ba estadu, tanba nee husu ba governu atu tau matan ba estrada iha area remotas.
“Ami nuudar motorista, sempre kumpri ami nia deveres hodi kumpri orientasaun estadu, kada fulan 6, selu taxa ba kofre estadu, tanba nee, husu governu autoridade RAEOA, atu tau matan ba emprezariu sira neebe hadia estrada iha area remotas, hodi hadia lalais estrada iha foho, atu nunee fasilita movimentu transporte publiku hanesan angguna mobiliza produtu povu nian ba merkadu atu lao diak,” dehan nia.
Iha biban nee mos nia husu ba governu liu husi Transporte no Komunikasaun liu husi Diresaun Nasional Transporte no Terestres, atu emprime ona kartaun kondusaun ho orijinal, tanba kuaze fulan 6 ona emprime nafatin kartaun kondusaun ho provizoriu.
(jos)
