DILI, STLTIMORLESTE.com – Polisia Nasional Timor Leste (PNTL) liu husi Departementu Tranzitu Seguransa Rodaviaria Nasional (DTSRN) kontinua halo pasa revista (sweeping) ba transporte privadu neebe laiha karta kondusaun no laiha dokumentu inklui dokumentus mate, hodi regulariza nafatin ba sidadaun utiliza transporte tuir kodigu estrada.
“Motorizada atus ida resin mak ohin ita prende laiha dokumentu no balu laiha karta kondusaun, balu dokumentu mate no balu karta kondusaun mate,” hatete Komandante Departamentu Tranzitu no Seguransa Rodoviariu Nasional, Superintendente Asistente, Luís da Costa ba jornalista sira iha Komando Jeral PNTL, Dili, Tersa (18/02/2025).
Nia dehan, servisu tranzitu seguransa rodaviaria nian loron-loron apoiu Komando PNTL Munisipiu Dili, atu bele normaliza no bele kontrola nia sidadaun sira neebe sirkula lori transporte publiku nomos transporte privadu.
“Pasa revista neebe mak husi Polísia Tranzitu Seguransa Rodaviaria halao nee atividades normal, ita halao diariamente hahu husi diresaun tranzitu seguransa rodaviaria nian no mos Komando PNTL Munisipiu Dili, ho objetivu atu regulariza ita nia sidadaun sira hotu atu sira bele utiliza transporte liu-liu motorizada sira nee tenke prienxe regra lei kodigu estrada nian,” nia esplika.
Nia informa, loron-loron sempre halo pasa revista ba iha dokumentu no karta kondusaun, nomos ba motor sira neebe mak la prienxe rekezitus nee karik sira viola sei prende para sira lori ba selu iha banku.
Luis deklara, pasa revista ba transporte privadu deit maibe la taka dalan ba transporte publiku no privadu hodi halo pasa revista ho razaun motorizada kuaze maioria halo movimentasaun nakonu iha Dili laran dala ruma dokumentus mate nomos laiha karta kondusaun.
Iha fatin ketak, Kondutor Taxi, Julio Filipe da Costa hatete, karreta taxi, mikrolet nomos karreta privadu barak mak Polísia Tranzitu prende, maibe karreta taxi neebe sira prende tanba kondisaun la diak no balu dokumetu laiha.
(jen)
