DILI, STLTIMORLESTE.com – Estudante neebe iha Pre Eskolar mesak labarik neebe ho idade tinan 4 no 5, nee duni nuudar edukador hanorin ho maneira oin-oin no tenke ho pasiensia.
“Hanesan edukador ita nian estudantes neebe mak foun, foin tama eskola, ita tenke hakbesik aan ba nia, husu nia naran no hela fatin, ita halo konversa ho nia, ita fo mentalidade forti ba nia, husu nia mai eskola halo saida,.mai para buka matenek, ita halo maneira oinsa labarik bele toman ho ita, nee duni ita mos hakbesik aan ba labarik, nudar edukador tenke pasiensia, tanba loron ida ba ida nia sei maus ba ita, no nia toman ona ho ambiente ida nee ho kolega sira seluk katak, fatin ida nee ninia,” dehan Koordenador Pre Eskolar Sagrada Familia Vila Verde, Cornelio A. Soares ba STL, Kinta nee (06/02/2025).
Cornelio dehan, labarik mai ho idade neebe kiik, profesor sira hanesan inan aman neebe ho pasiensia, atu nunee labarik sira bele toman no la buka sira nia inan aman, sira tur hakmatek iha sala laran, hanorin sira ho maneira oin-oin, hamaus sira hodi konversa ho sira, dala ruma balu mai toman kedas ho profesor sira.
“Balu neebe mak mai seidauk toman ho ita, ita nafatin buka meus oinsa bele toman lalais ho ita, tanba kada loron sira mai hamutuk ho ita, maske ho oras neebe mak naton, maibe ita nafatin buka dalan hamaus sira,” nia esplika.
Iha fatin seluk, Koordenadora Pre Eskolar Moris Foun I, Domingas Beatriz da Cunha hatete, labarik sira iha Pre Eskolar nee profesor sira mak pasiensia deit, tanba balu foin mai seidauk toman sira tanis ba sira nia inan ho aman tenke hein sira, maibe too semana sira bele toman ona ho profesor sira.
(jac)
