Edukador Prontu Hanorin Iha Neebe Deit

Ilustrasaun (Foto: Jurnal)

DILI, STLTIMORLESTE.com – Hanesan funsionariu ou edukador sempre prontu atu hanorin estudantes sira iha eskola neebe deit.

Haktuir Alexandre da Costa Belo, hanesan profesor neebe transferensia husi ESJ nu. 4 Setembru ba eskola Sekundariu Hera ba STL, Tersa (04/02/2025).

“Hau hanorin fali iha Eskola Sekundariu Hera, maibe ita nian profesores balu sira haruka ba fali eskola, no ami barak mak muda. Nuudar funsionariu prontu deit, maibe ami ladun konkorda mak transferensia jeral, maibe Eskola nu. 4 Setembru deit mak muda profesores ba hanorin fali iha eskola seluk,” nia dehan.

Iha fatin seluk, Diretor Eskola Sekundariu Jeral nu. 4 Setembru Balide, Sergio A. da Cruz hatete, profesores hirak neebe laiha naran iha karga orariu, nuudar funsionariu publiku sira tenke kumpri ba desizaun neebe ME fo liu husi karta, hanorin iha neebe deit, nee sira tenke prontu.

“Resposta husi ME liu husi Edukasaun Munisipiu iha ona, tanba nee fo ona karta ba ita nian profesores nain 25 nee para bele hanorin fali iha eskola neebe mak sei menus profesores, nee duni ita nian profesores balu horiseik ba foti ona sira nian karta iha Edukasaun Munisipiu Dili, balu ohin ba foti tan, nee duni ita nian profesores sira nee prontu atu kontribui, nee duni sira ba hanorin fali iha eskola neebe menus profesores,” nia afirma.

Sergio hatutan, liu husi quadro pesoal durante nee identifika profesores nain 25 mak la hetan karga orariu, ho ida nee hanesan Diretor Eskola haruka naran profesores sira nee ba iha Ministeriu liu husi Edukasaun Munisipal.

(jac)

Share it :

Leave a Reply

Your email address will not be published. Required fields are marked *