DILI, STLTIMORLESTE.com – Daudaun nee Servisu Edukasaun Munisipiu Ainaro halao ona enkontru ho inan aman estudante sira kona-ba farda eskola, no hein kompanhia atu fornese farda nee.
Informasaun nee hatoo husi Diretor Servisu Edukasaun Munisipiu Ainaro, Patricio da Costa Magno ba STL liu husi telefone, Tersa nee (25/02/2025).
“Husi Munisipiu Ainaro nee, eskola sira enkontru ho inan aman ona, depois inan aman hein fali informasaun, ami sei buka kompanhia ida neebe mak prepara atu suku farda nee ho kedas ninia logo, ida nee mak ami hein hela kompanhia ida neebe mak atu kaer, tanba nee tenke liu husi kompanhia, se inan aman buka deit balu iha no balu laiha, tanba ita hakarak uniforme nee hanesan,” nia afirma.
SEM Ainaro nee hatutan, sira halao ona enkontru ho inan aman estudante sira, tanba nee agora hein deit kompanhia neebe mak atu fornese farda nee, eskola sira mos buka hela ona, depois sira sei ba koalia iha Ministeriu, maizumenus kompanhia SEM mak buka deit ka Ministeriu mak deside kompanhia ida neebe.
Iha parte seluk, Diretor Servisu Edukasaun Munisipiu Likisa, Julio da Silva dehan, SEM Likisa koalia ona ho eskola sira, kompanhia no inan aman sira, maibe hena ba kor farda nee mak sei ulun moras oituan, nee duni sira seidauk tur hamutuk, pelumenus kor ida neebe mak bele, liu-liu ba nivel tolu, pre eskolar, ensinu baziku no sekundariu.
Nunee mos Sekretariu Estadu Ensinu Sekundariu Jeral no Ensinu Sekundariu Tekniku Vokasional, Domingos Lopes Lemos antes nee dehan, kuandu lansa ona uniforme nasional nee klaru despaisu neebe mak iha tiha ona Diretor Edukasaun sira, tanba nee mak esplikasaun nee beibeik ona iha media katak, ME fo deit ninia modelu kores ba munisipiu too iha eskola sira, inan aman sira mak prepara farda nee, laos ME mak prepara farda, lae.
(jac)
