BAUCAU, STLTIMORLESTE.com – Servisu Munisípal Edukasaun Baucau sei submete karta justifikasaun ba Ministériu Finansas (MF), atu bele kontinua implementasaun Programa Merenda Eskolar iha Munisípiu Baucau.
Diretor Servisu Munisípal Edukasaun Baucau, Afonso dos Santos da Costa, esplika tuir lei implementasaun programa merenda eskolar iha tinan ida aprova de’it ba períodu tolu. Maibé, ba Munisípiu Baucau, Servisu Munisípal Edukasaun planeia implementasaun to’o períodu haat, nune’e to’o ohin loron programa merenda eskolar seidauk bele kontinua implementa.
“Tuir Lei Finansas nian, Baucau liu ona pursentu períodu implementasaun nian. Entaun, ita tenke justifika fali ba Finansas ho karta ida liuhusi Munisípiu ba Ministériu Finansas, atu klarifika katak loos ona mak ita foin implementa. Tanba tuir lei, implementasaun períodu tolu iha tinan ida, agora ita nia implementasaun ba fali haat,” hateten Afonso ba STL iha Vila Antiga Baucau, Sesta (28/08/2026).
Mezmu nune’e, nia komenta, husi eskola sira iha Munisípiu Baucau ne’ebé sai benefisiáriu ba Programa Merenda Eskolar, maioria simu ona alokasaun orsamentu. Maibé, iha eskola 16 seidauk hetan alokasaun orsamentu, nune’e sira seidauk bele kontinua implementasaun programa ne’e.
Maibé Servisu Munisípal Edukasaun sei nafatin halo esforsu no tenta atu eskola 16 ne’ebé seidauk hetan alokasaun orsamentu, bele hetan orsamentu iha tempu badak hodi implementa Programa Merenda Eskolar refere.
“Ami hein katak eskola sira-ne’e tenke implementa hanesan. Ba eskola 16 ne’ebé seidauk hetan orsamentu, ami nafatin esforsu no tenta atu implementa lalais,” nia afirma.
Entretantu, dadus neebe antes STL hetan hatudu katak, estudante benefisiariu Programa Merenda Eskolar ba anu letivu 2026 iha Munisipiu Baucau liu rihun 34, kompostu husi Pre-Eskolar, Ensinu Baziku Primeiru, Segundu no Terseiru Siklu. Programa nee planeia atu halao durante loron efetivu 150, ho orsamentu hamutuk US$2,788,690, ne’ebé foin atinji loron efetivu 70.
(tom)
