DILI, STLTIMORLESTE.com – Tuir akademista no sosiedade sivil sira nia haree problema edukasaun iha Timor Leste komplikadu no grave tabes, tanba nee governu tenke tau atensaun.
Kestaun nee hatoo husi Akademista, Ireniu Viriatu Pires Martins ba STL iha nia knaar fatin Farol, Dili, Segunda (17/02/2025).
“Problema edukasaun, espesialmente iha Timor Leste komplikadu no grave tebes, Estadu no Governu TL hatur edukasaun ida dook los husi ita nia ODS neebe hatur edukasaun hanesan pilar importante ida ba dezenvolvimentu nasional. Dadus hatudu, Timor Leste ninia media tinan 4,5, kompara ho nasaun sira neebe ladun dezenvolvidu hanesan Kamboja (4,8), Kiribati (8,5), Laos (5,2), Myanmar (5,0), no Vanuatu (6,8). Nasaun sira dezenvolvidu no riku OECD ninia media 12,1 – 13,8 Siknifca TL tenke iha esforsu boot ida hadia kualidade edukasaun laos haree ba kuantidade maibe haree nia kualidade,” dehan nia.
Nia haree edukasaun iha TL iha Ministeriu Edukasaun, Sekretariu Estadu Tekniku Vokasional, Ministeriu Ensinu Superior, maibe edukasaun iha Timor Leste marka pasu iha fatin, laos totalmente la halo buat ida, maibe prosesu balu “Ita rekonhese maibe edukasaun presiza hakat ba oin, destaka rua ona TL diskuti deit mak problema fasilidade, infraestrutura, Kurikulu, iha nasaun seluk referensia hatudu Estadu no Governu diskuti oinsa edukasaun nee bele tama iha standar internasional.
Nunee mos Visi Diretor HAK, Antinino de Limas hatete, dezenvolvimentu iha area oin-oin hanesan dezenvolvimentu iha sosiu ekonomiku, kultural, dezenvolvimentu iha setor infraestrutura.
“Liu-liu iha setor edukasaun nee atu prepara ema, kurikulu sira nee tenke diak, kualidade professor sira tenke hadia, iha fasilidade eskola, nunee sira bele transmite matenek, konhesimentu ba estudante sira mos ho kualidade, buat neebe presiza iha edukasaun pre eskolar nee mak edukasaun moral, ida nee numeru um, ho nunee foinsae sira husi kiik too boot iha abilidade no hahalok neebe diak,” katak nia.
(eme)
