DILI, STLTIMORLESTE.com – Servisu Edukasaun Munisipiu Lautem husu ba estudantes sira iha eskola Munisipiu Lautem, tenke prepara aan estuda hodi hasoru ezame segundu periodu, neebe tuir kalendariu sei halao iha loron 13 fulan nee.
Lia hirak nee hatoo husi Diretor servisu Edukasaun Munisipiu Lautem, Anibal Fernandes ba STL liu husi telefone, Tersa nee (07/07/2026).
“Konaba preparasaun ezame segundu periodu nian nee, hau nuudar Diretor Edukasaun Lautem, ba preparasaun ezame nian nee ami halo tiha ona enkontru ho ita nian eskola sira para sira bele halo preparasaun, hanesan kria komisaun, elabora pontus ezame no seluk tan, hau hanoin ita nian eskola ida-idak halo tiha ona preparasaun ida nee, nee duni husu ita nian estudantes sira presiza estuda, tanba semana oin hahu ezame segundu periodu ninia,” dehan nia.
Anibal dehan, eskola sira hahu halo preparasaun ba ezame segundu periodu nian, tanba nee husi parte Edukasaun Munisipiu Lautem nafatin halo lina koordenasaun neebe mak diak ho parte direjente husi eskola idak-idak, ho nunee bele halo preparasaun neebe mak diak iha ezame segundu periodu ninia, tanba semana oin nee hahu ezame, agora ba edukasaun pre eskolar no filial sira nee halo deit avaliasaun ba estudantes sira.
“Ita nian estudantes husi sentru, sekundariu no tekvo sira mak partisipa iha ezame, maibe estudantes husi pre eskolar no filial nee ita nian profesores sira halo deit avaliasaun ba sira, depende ba profesores da turma sira, tanba foin daudaun ami halo ona enkontru ho ita nian eskola sira,” nia dehan.
Tuir Anibal, durante nee estudantes sira ativu ona iha prosesu ensinu aprendizajen, nunee materia husi kada profesores idak-idak sira hetan ona no sira bele estuda molok sira tuir ezame iha semana oin, tanba estudantes sira mak futuru ba rai ida nee, oinsa estuda para sira bele hetan valor neebe mak diak husi ezame, nee duni nafatin husu estudantes sira prepara aan ho diak.
“Ita espera semana oin ita nian estudantes hotu sei partisipa iha ezame, tanba durante nee ita nian profesores sira kada loron ativu iha prosesu aprendizajen, konaba fasilidade meza no kadeira inklui sala de aula sufisiente ba ita nian estudantes sira, eskola idak-idak ninia sala neebe ita nian estudantes sira uza sei sufisiente ba ita nian estudantes sira,” nia esplika.
Nunee mos Diretor Servisu Edukasaun Munisipiu Bobonaro, Miguel Freitas hatete, los duni katak, iha tempu besik estudantes sira sei tuir ezame segundu periodu, profesores husi eskola sira prepara pontus ezame para hatama daudaun ona, estudantes sira estuda, tanba disiplina neebe profesores sira fo ona, ida nee presiza prepara aan estuda, liu husi estuda mak bele hetan valor diak.
“Hau hanoin los duni katak, iha tempu besik estudantes sira sei tuir ezame segundu periodu, profesores husi eskola sira prepara pontus ezame para hatama daudaun ona, estudantes sira estuda, tanba disiplina neebe profesores sira fo ona, ida nee presiza prepara aan estuda, liu husi estuda mak bele hetan valor diak,” nia dehan.
Miguel akresenta, konaba ezame nee eskola sira prepara aan daudaun ona, liu-liu profesores sira prepara pontus ezame para bele hatama daudaun ona ba eskola, balun kria ona ekipa, neebe haree ba ezame ninia, preparasaun hirak nee husi eskola sira hahu prepara ona, estudantes sira presiza estuda.
“Ita nian estudantes sira hakas aan estuda. Hau hanoin fasilidade sei sufisiente ba ita nian estudantes sira hodi uza ba ezame segundu periodu, ita husu estudantes sira estuda, maibe ita nian estudantes husi pre eskolar no filial nee partisipa iha avaliasaun,” nia dehan.
Nia dehan, husi sira nian parte nafatin halo koordenasaun neebe diak ho dirijente husi eskola sira para hasoru difikuldade ruma bele hatoo informasaun ba malu, tanba koordenasaun servisu nee importante tebes.
Iha fatin la hanesan, Julio da Silva nuudar Diretor Servisu Edukasaun Munisipiu Liquiça hatete, konaba ezame II periodu nee, eskola sira mak halo preparasaun, oinsa sira prepara materia ezame nian, kria komisaun organizadora ba ezame segundu periodu nian, estudante sira prepara estuda.
“Hau hanoin konaba ezame II periodu nee, eskola sira mak halo preparasaun, oinsa sira prepara materia ezame nian, kria komisaun organizadora ba ezame segundu periodu nian, estudante sira prepara estuda,” nia esplika.
(jac)
