Eis Kargu Xefia Kestiona, Simu Subsidiu La Kompletu

Osan dolar Amerikanu (Foto: Espesial)

DILI, STLTIMORLESTE.com – Eis kargu xefia kestiona subsidiu neebe sira simu iha fulan Dezembru 2024 nee la kompletu, no sira ba konfirma ona iha Ministeriu Edukasaun (ME), maibe seidauk fo resposta ba sira.

Lamentasaun nee hatoo husi eis Adjuntu Diretor Eskola Sekundariu Jeral no 4 Setembru Balide, Alexandre da Costa Belo ba STL iha nia knaar fatin Balide, Dili, Kinta nee (16/01/2025).

“Ami kala simu duni la kompletu, tanba kuaze US$ 600.00 mak laiha, depois laiha juatifikasaun ba ami. Ami nia maluk balun hatoo kona-ba osan la kompletu nee ba Diretor Rekursu Umanus no Finansas ME, maibe laiha resposta too agora,” nia esplika.

Nia dehan, sira nia ezijensia mak husu sira nia klarifikasaun ba eis kargu xefia sira, maibe too agora husi parte Rekursu Umanus ME seidauk iha resposta ba sira, no sira hein deit bainhira husi ME fo resposta ba asuntu ida nee.

Iha fatin seluk, Eis Diretor Ensinu Baziku Sentral (EBC) Fatumeta, Feliciano Gusmão hatete, iha loron 30 fulan Dezembru 2024 nee sira ba konfirma kedas no sira husu agradese ba ME tanba iha ona vontade hodi selu ona sira nian subsidiu neebe mak durante nee sira kestiona, maibe sira mos ezije atu bele esforsu tan kona-ba eskalaun nian nee, tanba tama hotu iha lei 31 de Maiu 2023 nian, hodi sira bele tau atensaun ba iha eskalaun nian nee sira dehan sei buka lei oan ida hodi haforsa ba lei 31 de Maiu nee.

“Hau sente kona-ba subsidiu husi Munisipiu Dili nian sai hotu ona, maibe koa ba taxa mak boot, eis kargu xefia hanesan ami diretor, koordenador sira hotu kedas simu ona subsidiu ida nee, ami simu fulan 12 nian deit. Ami simu subsidiu nee iha fulan Dezembru tinan kotuk nian nee tama iha gaji 13,” katak nia.

(jac)

Share it :

Leave a Reply

Your email address will not be published. Required fields are marked *