DILI, STLTIMORLESTE.com – Ekipa konjunta kompostu husi Komisau Funsaun Publiku, Komisaun Anti Korupsaun, Provedoria Diretu Umanu no Justisa, no Inspetor Jeral Estadu halao vizita supreza ba iha Diresaun Jeral Servisu Rejistu Notariadu (DJSRN) no Konservatoriu Servisu Rejistu Notariadu Munisipiu Dili.
“Funsionariu ida rua mak sei atraza hela, maibe Diretor dehan sira sempre kontrola malu se mak mai tarde beibeik, sira fo karta ba Funsaun Publiku hodi halo prosesu disiplinar ba sira,” dehan Komisariu Funsaun Publiku, Asuntu Disiplinar, Agapito da Conceição ba jornalista sira, banhira remata vizita iha Diresaun Notariadu Kolmera, Tersa (11/02/2025).
Nia hatutan, sira iha sistema ida atu kontrola kona-ba lista prezensa, tanba nee lista sira neebe haruka ba tuir lei sei koa sira nia osan, no durante nee koa ona funsionariu balu nia osan, bazeia ba Estatutu Funsaun Publiku tuir lei hateten.
Vizita nee ba iha instituisaun hotu atu hadia, atu Governasaun nee bele lao ba oin, no salariu nee koa tuir estatutu neebe iha, se nia atrazu oras rua tau hamutuk ba oras ualu koa loron ida.
Hatan kona-ba vizita ba iha Konservatoriu, nia parte dehan, difikuldade neebe iha mak kona-ba makina, tanba nee husu atu bele buka solusaun.
Iha fatin hanesan, Adjuntu Komisariu KAK, Rosario Araujo dehan, funsionariu neebe tama servisu la tuir oras, prejuizu boot ba Estadu.
“Se tama servisu la tuir oras prejuizu boot ba Estadu, funsionariu ida halao servisu tuir kontratu neebe hateten ona, tama tuku ualu,” dehan bia.
Nia hatutan, KAK nia prezensa atu hateten funsionariu servisu tuir oras, se mai tarde komunidade sira mai uluk tiha, ida nee prejudika tebes atendimentu Estadu nian ba komunidade sira. Ida nee tama ba iha koruptu ba mentalidade, tanba nee presiza hadia atu ema hotu bele servisu tuir kontratu no Estadu ida nee.
Afirma, vizita nee servisu hamutuk ekipa hodi haree saida mak presiza atu hadia, hodi funsionariu hotu bele servisu tuir oras kontratu nian.
Hatan kona-ba vizita Konservatoriu Servisu Rejistu Notariadu Munisipiu Dili nian, nia parte dehan, atu haree prosesu servisu lao tuir nia dalan ka lae, haree mos kestaun balu neebe kestiona komunidade sira, kestaun balu iha media no balu sira rasik mak enfrenta diretamente hatoo ba iha autoridade sira.
Reforsa, vizita nee atu haree velosidade husi informasaun neebe mak iha, se loos sai hanesan baze ida hodi hadia instituisaun nee nia servisu.
Aleinde nee, Diretor Rejistu Notariadu, Agustinho Gonsalves Viera dehan, funsionariu sira tama servisu tuir oras neebe iha, sira neebe tama tarde tau iha lista prezesa falta.
“Balu mai tuku 7:00 7 no 7:20, sira iha nee hotu ona, as vezes sira mai balu la asina lista prezensa maibe sira iha nee hotu hela, ida rua mai tarde laos sira hotu,” dehan nia.
Nia hatutan, regra normal sira tama servisu 7:30 fo toleransia too tuku 8:00, kuandu liu husi ida nee tau falta ona, durante nee aplika hela, la iha tolerensia ba funsionariu sira neebe mai tarde.
Funsionariu sira neebe mai tarde mak sansaun ba sira tau falta, hodi koa sira nia osan. Garante la iha manipulasaun husi funsionariu sira kona-ba lista prezensa neebe mak iha, no sempre iha kontrola, tanba se mak manipula la iha toleransia ba sira.
Tuir observasaun jornalista STL iha terrenu haree katak, vizita neebe ekipa halao ba iha Diresaun Jeral Servisu Rejistu Notariadu Kolmera, iha dader tuku 8:00 too remata, kontinua kedan halao vizita ba iha Konservatoriu Servisu Rejistu Notariadu Munisipiu Dili nian.
(ter)
