Ema Presiza Fiar, Tuba Rai Metin Ba Maromak

Ilustrasaun (Foto: Espesial)

DILI, STLTIMORLESTE.com – Ema presiza tuba rai metin harii relasaun ho Maromak, tanba Nia deit mak hun no rohan laek ba buat hotu.

Lia hirak nee hatoo husi Padre Richardo Pasang, SVD ba STL liu husi nia refleksaun diaria via telefone, Tersa (04/02/2025), semana IV do tempu komum Heb. 12 : 1 – 4 Marc. 5 : 21 – 43.

Padre dehan, iha reflesaun ema neebe susesu iha moris hateten nunee ema bele atinji susesu tanba nia perseveransa tuba rai metin. Perseveransa katak fiel husi asuntu kiik sira atu bele produz asuntu boot sira iha moris. Perseveransa sei lori ema ba susesu moris.

“Surat ba Hebreu sira, iha primeira leitura fo mensagem importante ba ita atu tuba rai metin atu harii relasaun ho Maromak. Ho nunee , ita bele apriende hanesan Nai Jesus Kristo nebee tuba metin simu Kruz, la tauk Kruz nia todan, simu terus hodi ema maksalak nia fatin,” dehan Padre.

Bibi Atan Kreda Katolika dehan, Tuba rai metin iha fiar, Jairo lori salvasaun ba nia oan feto neebe mate, bele moris fila fali. Milagres ida nee tanba Jairo nia fiar. Tanba Jairo nia perseveransa ba Maromak nia kbiit.

“Tanba tuba rai metin iha fiar feto ida neebe tinan sanulu resin rua mak fakar ran, hetan fali isin diak. Jesus dehan ba feto nee hau oan feto, o nia fiar mak soi o, O bele ba ona, o hetan fali isin diak. Jesus dehan ba Jairo wainhira nia oan feto mate O keta tauk, husu katak o fiar Wainhira Jesus hare ema barak tanis ba labarik feto nee, Jesus dehan Labarik la mate, nia toba Jesus hatudu Nia kbiit hodi dehan Talitha Kum katak Menina, Hau haruka o, hamriik tiha. Ema hotu hakfodak. Milagre hirak nee, hodi hanorin mai ema katak ema neebe tuba rai metin iha fiar, sei hetan salvasaun, sei hetan susesu moris,” katak Pe.

Iha biban nee Padre husu sarani sira hotu hotu atu tuba rai metin iha Jesus Kristu ho fiar sei hetan salvasaun.

Padre hatutan, susesu moris sei bele hetan liu husi perseveransa. Tuba rai metin katak fiel ba buat kiik atu bele atinji ba buat boot iha ema moris. Tuba rai metin halo buat neebe imposivel sai posivel. Tuba rai metin bele halo ema seluk hakfodak no doko ulun ba saida deit neebe ema hetan iha nia moris. Tuba rai metin iha fiar katak Sei garante ema ba salvasaun husi Nai. Tanba tuba rai metin iha fiar, oan husi Jairo bele moris fali, feto faluk moras fakar ran, hetan fali isin diak. Ema nia fiar, sei garante nia salvasaun bom susesu ho ema nia perseveransa.

(eme)

Share it :

Leave a Reply

Your email address will not be published. Required fields are marked *