DILI, STLTIMORLESTE.com – Embaixador Nao Rezidente Husi Arjentina, Gustavo Rivardo Coppa hatete, kafe Timor Leste sabor diak, tanba nee nia sei promove iha Arjentina.
Embaixador Nao Rezidente husi Arjentina, Gustavo Rivardo Coppa hatoo kestaun nee ba jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensial, Bairo Pite, Tersa (18/02/2025).
“Hau gosta kafe, ita boot hatene bainhira hau too iha aeroportu horiseik. Protokolu oferese kafe ida mai hau no hau labele hemu deit ida, maibe hau hemu kafe kopu rua, tanba kafe nee diak tebes no sabor diak,” dehan Embaixador nee.
Nia hatete, ohin hasoru Prezidente koalia kona-ba kooperasaun rai rua, aleinde nee Prezidente mos oferese kafe ba embaixador, kafe neebe gostu no sabor la uza masimidar mos bele.
“Iha nee hau hemu kafe neebe Prezidente oferese mos, tuir lo-loos nee diak tebes. Hau gosta kafe la ho masimidar mos gostu, hau la presiza aumenta masimidar diak tebes, ho serteza, hau foti saku ida hanesan bainhira fila ba uma hodi hemu no fahe ho hau nia belu sira hodi promove kafe neebe ho kualidade kapas iha tempu ida agora,” katak nia.
Embaixador dehan, asuntu kona-ba kafe mos sai hanesan asuntu ida neebe Prezidente ho embaixador diskute. Tanba nuudar ema Arjentina gosta duni hemu kafe, maibe infelizmente sira laiha promosaun kafe nian, no iha tinan balu tuir mai Arjentina bele promove kafe.
(eme)
