BAUKAU, STLTIMORLESTE.com – Familia kestiona prevensaun moras rabies iha Baukau, tanba pasiente inisial EX, idade 62, neebe asu tata la hetan vasina.
Ho emosaun oan mane pasiente EX, Agostinho Ximenes Belo aprezenta, pasiente EX asu tata iha loron 08 Marsu tinan nee, iha Aldeia Maukale, Suku Gariuai, Postu Administrativu Baukau Vila, iha neebe nia parte evakua kedas EX ba Hospital Rejional Eduardo Ximenes (HoREX) Baukau atu hetan tratamentu inklui vasina rabies, maibe too iha HoREX parte mediku sira fase deit kanek asu tata fatin nian ho bee no fo aimoruk ba EX no haruka fila ba uma, maibe la fo vasina rabies nian ba pasiente nee.
“Ami familia la kontente ho atendimentu iha Hospital, tanba sira mak hatene liu kona-ba moras ida nee, maibe halo familia nia fuan moras mak, tanba sa sira labele fo vasina iha momentu neeba,” Agostinho Ximenes Belo hateten hatete ba jornalista sira iha HoREX Baukau, Kinta (14/05/2026).
Nia sublina, loloos parte mediku sira fo vasina ba pasiente nee iha momentu neebe asu tata, maibe la fo vasina haruka pasiente fila ba uma iha neebe familia garante katak pasiente kondisaun diak ona husi asu tata, maibe iha loron 09 Maiu nee pasiente infrenta fali kondisaun han no hemu tauk.
Tanba nee parte familia lori ba Hospital Rejional Eduardo Ximenes (HoREX) Baukau, iha neebe mediku sira haree deskonfia pasiente infrenta sintoma rabies.
“Ami familia rona dehan sintoma rabies ami familia fuan moras senti triste, tanba antes nee ami familia lori mai tratamentu,” Agostinho Ximenes Belo kestiona.
Nia komenta, mezmu Munisipiu Baukau iha ona ekipa Task Force ba prevensaun moras rabies nian neebe hadaet husi aninal hanesan asu, busa no lekirauk, iha neebe bainhira sidadaun ida hetan tata husi asu, ekipa refere atu halo prevensaun liu husi vasina , maibe durante pasiente refere fila husi HoREX ba nia rezidensia Suku Gariuai, ekipa task force refere la marka prezensa.
Ho asaun nee, pasiente nia oan mane nee konsidera, ekipa refere laiha funsaun atu eziste, tanba durante nee la tun terrenu observa kondisaun rabies, neebe deskonfia pasiente infrenta.
“Hau nuudar oan mane la kontente ho atendimentu sira hanesan nee, hau hakarak husu deit atu labele akontese tan hanesan hau nia mama nee, husik hau nia mama mak hetan ona moras hanesan nee, lalika mosu tan hanesan nee ba ema seluk,” Agostinho espresa.
Mezmu teste laboratorium nasional seidauk fo sai rezultadu teste ba pasiente EX, maibe familia nee husu parte saude atu atende pasiente refere hodi rekupera husi moras neebe pasiente atual infrenta.
Enkuantu Iha loron 13 Maiu nee, Diretor Klinika HoREX Baukau, Francisco Mouzinho da Costa Belo hateten ona, sidadaun refere asu tata no halo ona tratamentu iha HoREX Baukau, maibe momentu neeba pasiente la hetan vasina razaun, tanba HoREX laiha estock vasina ba rabies.
(tom)
