BAUKAU, STLTIMORLESTE.com – Eskola Sekundaria Jeral Dom Carlos Filipe Ximenes Belo Afasa, iha Postu Administrativu Kelikai Antigu, Munisipiu Baukau, daudaun iha deit profesores nain 2 hodi akompanha estudante sira iha prosesu aprendizajen.
Koordenador Eskola, Carlos Ximenes Filipe esplika, antes Ministeriu Edukasaun seidauk hapara profesores kontratadu sei sufisiente hodi hanorin estudante sira, maibe iha tinan 2023 bainhira Ministeriu Edukasaun hapara profesores kontratadu sira, prosesu aprendizajen iha eskola refere lao la efetivu, tanba iha deit profesores nain 2.
“Tuir kurikulu, profesores ida lori materia ida, maibe tanba profesores laiha entaun ami nain 2 koloka, hau lori materia 4 hau nia kolega seluk lori materia 3,” hatete Carlos ba jornalista sira iha Kelikai Antigu, Kinta (06/02/2025).
Koordenador eskola nee informa, total estudante neebe rejistu iha eskola refere hamutuk nain 136, feto 80 no mane 56 neebe rejistu sala 3 kompostu desimu anu no desimu segundu anu, neebe durante prosesu aprendizajen anu letivu 2025 hahu iha fulan Janeiru, kada loron sala ida tenke abandona estudante iha prosesu aprendizajen, tanba razaun menus profesores.
Tuir nia, relasiona menus profesores iha eskola refere fo impaktu ba estudante sira, tanba kada materia prosesu aprendizajen nian hetan la kompletu.
Enkuantu reprezentante Estudante ESJ Afasa, Cristina Ximenes sente triste, tanba anu letivu 2025 nian neebe prosesu aprendizajen hahu iha fulan Janeiru too Fevereiru nee sente lakon tempu, maibe la hetan materia ho sufisiente, tanba menus profesores.
“Ami estudante husu Ministra Edukasaun haruka profesores balu mai hanorin ami, tanba agora ami iha deit profesores nain 2,” Cristina rekomenda.
Relasiona asuntu nee, STL tenta atu konfirma Diretor Servisu Edukasaun Munisipiu Baukau, maibe laiha fatin atu fo komentariu.
Entretantu estudante 138 neebe rejistu iha eskola ESJ Dom Carlos Filipe Ximenes Belo Afasa, husi Suku Namanei, Afasa, Gurusa, Waitame, inklui Tekinomata Postu Administrativu Laga ho profesores permanente nain 2.
(EST 2)
