DILI, STLTIMORLESTE.com – Diretor Eskola Sekundaria Jeral (ESJ) nu. 4 Setembru hatete, bainhira udan sala 5 no baranda iha Eskola Sekundariu Jeral nu. 4 Setembru nakonu ho bee.
“Loos duni katak, bainhira udan lori tempu neebe naruk, ami nian sala lima nee bee mosu rasik nalihun iha laran inklui varanda, sala lima nee sala haat uza ba atividades osis nian, no sala ida seluk ami uza ba halao ensinu aprendizajen, maibe agora daudaun sala lima nee ami labele uza hodi halao atividades, tanba udan la para bee la maran, no sala tolu seluk ami nian estudantes sira uza halao aprendizajen, maibe varanda mak bee nalihun hela,” dehan Sergio ba STL iha nia knaar fatin Balide, Segunda nee (10/02/2025).
Sergio dehan, kuandu bee tama deit karik sira bele hamoos, maibe ida nee bainhira udan la para bee mosu rasik no la maran, entaun atu haruka estudantes sira hamoos labele, tanba bee mosu rasik, buka bee nia matan mosu iha neebe la hatene.
“Sala neebe mak ohin hau temi ona nee, bainhira udan la para nee bee komesa nakonu ona iha laran, tanba bee matan mosu rasik husi rai okos, nee ita bele hamoos oinsa bele nafatin nakonu iha laran,” nia esplika.
Entretantu Carlito do Rego Maraues da Costa hanesan estudante dehan, los duni katak sira nian sala parte kraik besik estrada boot ninia neeba, bainhira udan bee nakonu no varanda nee sira lao ba mai la diak, tanba bee nakonu iha laran, inklui sala aprendizajen balu mos bee mosu rasik iha rai okos.
(jac)
