DILI, STLTIMORLESTE.com – Eskola haat nolu resin rua (42) neebe mak lokaliza iha Munisipiu Ainaro, too agora sei menus meza no kadeira nomos eskola tolu nolu resin ida (31) presiza aumenta sala de aula ba estudantes sira.
Kestaun nee hatoo husi Diretor Servisu Edukasaun Munisipiu Ainaro, Patricio da Costa Magno ba STL liu husi telefone, Kinta nee (25/06/2026) katak, dezafiu neebe mak eskola sira iha Ainaro enfrenta mak hanesan sala de aula iha eskola balun sei menus, ba oin tenke aumenta sala de aula ba estudantes sira, tanba too agora eskola balun sei menus sala de aula inklui meza no kadeira iha eskola 42 mak sei menus.
“Maske ita halo ona pedidu ba iha parte ME nasional, maibe too agora seidauk hetan resposta konaba asuntu ida nee. Konaba kaderneta eskolar nee kada tinan hau sempre halo pedidu ba iha ministériu no sempre fo apoiu mai ita nian eskola sira, livrus mos hanesan, nee husi kurrikulu ME nian mak fo no ita apoiu ona ba eskola sira, livrus ba setimu ano ninia. Ita nian eskola hamutuk 31 mak menus sala de aula, ita nian pedidu nee ita haruka ona ba iha Ministériu no PAM mos iha ona,” nia esplika.
Nia deklara, konaba total eskola 42 nee hahu husi nivel pre eskolar, ensinu baziku, nee sei menus meza no kadeira, maske pedidu nee haruka ona ba ME, maibe tanba dehan seidauk iha meza no kadeira, tanba meza no kadeira balun neebe tuan nee aat hotu ona, tanba nee ba oin tenke husu aumenta foun para bele fasilita estudantes sira iha atividades prosesu ensinu aprendizajen iha eskola ida-idak.
“Ita nian fasilidade hirak nee eskola balun iha ona no balun neebe ohin hau mensiona nee mak sei menus fasilidade, restu nee iha hotu ona, nunee mos ita nian kondisaun eskola balun mak presiza reabilitasaun no balun presiza konstrusaun foun ba ita nian estudantes sira, tanba ita nian edifisiu eskola balun neebe ita presiza hadia,” nia esplika.
Nia esplika, meza no kadeira inklui sala de aula nee importante tebes ba estudantes sira, prosesu aprendizajen iha eskola sira nee atu lao diak mak governu liu husi ME nafatin kria kondisaun eskola no prepara fasilidade ba estudantes sira, nunee atividades prosesu aprendizajen bele lao diak liu tan, kuandu la kria kondisaun neebe diak no eskola sira barak sei menus fasilidade, oinsa atu garante aprendizajen ba estudantes iha eskola.
“Ita hakarak fasilidade eskola, kondisaun eskola nee diak, tanba ita nian governu liu husi ME balun hahu hadia no fo apoiu daudaun ona ba ita nian eskola sira, depois meza kadeira neebe aat nee tenke troka, labele husik deit nunee,” nia informa.
Iha fatin seluk, Diretor Servisu Edukasaun Munisipiu Liquiça, Julio da Silva dehan, eskola iha area remotas balun sei menus meza no kadeira no kondisaun eskola balun presiza hadia no aumenta sala de aula, kestaun hirak nee hotu SEM halo pedidu ba nasional para eskola sira nee bele hetan apoiu fasilidade husi parte edukasaun.
“Ita nian eskola iha area remotas balun sei menus meza no kadeira, no kondisaun eskola balun presiza hadia no aumenta sala de aula, kestaun hirak nee hotu SEM halo pedidu ba nasional para eskola sira nee bele hetan apoiu fasilidade husi parte edukasaun,” katak nia.
Hatan ba asuntu nee, Diretor Nasional Ensinu Sekundariu iha ME, Benjamin Gomes da Cruz Fernandes hatete, bainhira eskola neebe menus fasilidade husu Diretor eskola sira presiza halo pedidu mai iha ministériu para bele hetan apoiu meza no kadeira husi Diresaun Infraestrutura ME nian, kuandu la halo pedidu mai oinsa mak ME atu fo apoiu.
(jac)
