DÍLI, STLTIMORLESTE.com – Eskola Sekundariu Jerál Nobel da Paz loke odamatan ba ema ho defisiénsia (EhD) atu asesu edukasaun no aprende hamutuk ho estudante seluk, laiha diskriminasaun.
Lia hirak ne’e hato’o husi Asesor Eskola Nobel da Paz, Lourenço Ximenes ba STL iha Balide, Sesta (23/10/2026).
Lourenço Ximenes hatete katak, Eskola Nobel da Paz servisu hamutuk ho Ministériu Edukasaun atu fó oportunidade ba ema ho defisiénsia asesu edukasaun, tanba seidauk iha eskola espesífika sufisiente ba estudante sira-ne’e.
Nia esplika katak, ema hotu iha direitu hanesan atu hetan tratamentu ne’ebé justu, maski sira iha defisiénsia, tanba ema hotu mak maun-alin no kriatura Maromak nian.
“Jesus hanorin ita atu hadomi ema seluk hanesan ita-nia an rasik. Tanba ne’e, ita tenke pratika hanorin ne’e iha moris loroloron, liuliu hodi tau matan ba ema sira ne’ebé enfrenta difikuldade. Prinsípiu ne’e mak ami aplika iha eskola hodi loke odamatan ba ema ho defisiénsia,” nia dehan.
Nia afirma katak, Eskola Nobel da Paz konsidera estudante ho defisiénsia nu’udar parte integrante hosi komunidade eskolar, tanba sira iha direitu hanesan atu hetan edukasaun no dezenvolve sira-nia kapasidade.
Tuir nia, iha prosesu aprendizajen, profesór sira hanorin estudante hotu no akompaña sira atu bele komprende matéria ne’ebé hanorin iha sala aula.
Nia mós subliña katak, estudante hotu tenke trata malu hanesan maun-alin, la halo diskriminasaun no fó domin malu, atu kria ambiente eskolar ne’ebé seguru, inkluzivu no respeita diferensa.
Lourenço Ximenes dehan katak, ema la bele buka de’it benefísiu ba an rasik, maibé tenke ajuda malu no kompleta malu, tanba iha moris ne’e solidariedade no domin ba ema seluk importante tebes.
Nia husu ba estudante ho defisiénsia atu la lakon esperansa atu kontinua sira-nia estudu, tanba sira mós iha direitu hanesan atu hetan oportunidade edukasaun.
Agora daudaun estudante ho defisiénsia hamutuk nain 10 mak asesu edukasaun iha Eskola Nobel da Paz.
Nia mós relata katak tinan kotuk, estudante ho defisiénsia nain 15 ne’ebé estuda iha Eskola Nobel da Paz kontinua sira-nia estudu iha Universidade Nasionál Timor Lorosa’e (UNTL).
(joa)
