DILI, STLTIMORLESTE.com — Prezidente Repúblika, José Ramos-Horta, rejeita informasaun katak Timor-Leste (TL) okupa pozisaun dahuluk iha Índise Hamlaha Globál.
Prezidente Ramos-Horta hato’o deklarasaun ne’e ba jornalista sira iha Palásiu Prezidensiál, Bairo Pite, Dili, Sesta-feira, 23 Outubru 2026, no konsidera informasaun ne’e la loos.
“Ne’e bosok. Sé mak halo ida ne’e, hau la hatene. Iha rai seluk hanesan Afganistaun, Iémen, Kongo no Sudán,” dehan Ramos-Horta.
Xefe Estadu ne’e la konkorda ho informasaun ne’ebé hatudu Timor-Leste nu’udar nasaun ho hamlaha aat liu iha mundu.
Nia husu atu haree mós situasaun iha nasaun seluk ne’ebé enfrenta krize alimentár no kondisaun moris difísil liu.
Entretantu, Índise Hamlaha Globál (Global Hunger Index — GHI) mak relatóriu anuál ne’ebé sukat no monitoriza situasaun hamlaha iha nasaun sira iha mundu.
Organizasaun Concern Worldwide, Welthungerhilfe no instituisaun parseira sira mak produz relatóriu ne’e atu avalia nivel hamlaha no problema nutrisaun.
GHI uza indikadór haat, mak populasaun ho malnutrisaun, labarik nia kresimentu atrazadu, labarik nia todan menus kompara ho altura, no mortalidade labarik.
Tuir dadus GHI 2025, Timor-Leste hetan pontuasaun 28,0, ne’ebé klasifika nasaun ne’e iha kategoria hamlaha grave.
Pontuasaun ne’e hatudu katak Timor-Leste kontinua enfrenta dezafiu boot iha seguransa alimentár no nutrisaun, maibé la signifika nasaun ne’e okupa pozisaun dahuluk iha mundu.
(eme)
