DILI, STLTIMORLESTE.com – Bainhira remata konstrusaun sala de aula sei halo moru protesaun, atu nunee bele asegura diak liu tan estudante sira.
Haktuir Fundador Eskola Nobel da Paz atual Diretor Eskola Sekundariu, Jeremias P. de Jesus ba STL iha nia knaar fatin, Tersa nee (11/08/2026).
“Agora daudaun ami nian konstrusaun sala de aula no sala enkontru nian nee seidauk remata, maibe bainhira remata ami sei halo moru eskola nian, antes ami atu halo moru ami sei koordena ho ita nian komunidade neebe mak hela besik ami nian eskola ida nee, ami nian sala aprendizajen nee sufisiente ona ba ami nian estudante sira,” katak nia.
Nia dehan, moru nee tenke halo duni para bele asegura estudante sira, bainhira halo ona moru nee halo portaun, ho nunee bele halo kontrolu estudantes neebe mai iha eskola, maibe la tuir aprendizajen, konstrusaun sala de aula nee agora daudaun hein monta keramik no pinta, atu nunee estudantes sira bele uza iha ezame nasional.
“Moru eskola nee ita halo husi parte estrada ninia, tanba eskola nee besik ita nian komunidade sira nian uma, oinsa ita koordena ho komunidade sira nee importante tebes, ami nian konstrusaun eskola nee andar rua, andar ida remata los ona no ida seluk seidauk remata ida, espera tempu badak bele remata ona,” tenik nia.
Nia dehan, antes nee estudantes sira uza sala aprendizajen neebe ho kondisaun ladun diak, maibe agora daudaun estudantes sira uza edifisiu eskola ho kondisaun sala neebe andar, agora daudaun salaun boot neebe atu halao enkontru ruma nee ninia konstrusaun sei lao hela seidauk remata.
“Bainhira kontrusaun remata ami nian estudantes sira sei uza hotu sala nee, inklui salaun boot iha andar nee falta monta keramik no pinta inklui monta odamatan para bele finaliza ona ninia konstrusaun, nee tanba ami nian sala balun estudantes sira uza ona, bainhira finaliza hotu ona mak ami sei hahu halo fali moru protesaun, ho nunee ami bele haree portaun ida deit,” nia komenta.
Nunee mos Julio Nunes nuudar estudante dehan, los duni too agora sira seidauk iha moru, dala ruma estudantes balun hamriik deit iha liur, bainhira iha moru para estudantes sira dader mai eskola tenke tama hotu sala, balun hamriik deit iha estrada nee ba, kuandu iha moru mak profesores sira bele halo kontrolu ba estudante sira.
“Los duni too agora ami seidauk iha moru, dala ruma estudantes balun hamrik deit iha liur, bainhira iha moru para estudantes sira dader mai eskola tenke tama hotu sala, balun hamriik deit iha estrada nee ba, kuandu iha moru mak profesores sira bele halo kontrolu ba estudante sira,” dehan nia.
Entretantu Francisca de Jesus Martins nuudar estudante, bainhira eskola seidauk iha moru nee profesor sira susar atu halo kontrolu ba estudante sira, nunee estudantes sira tama sala tuir sira nian hakarak deit.
“Hau hanoin bainhira eskola seidauk iha moru, nee profesor sira susar atu halo kontrolu ba estudante sira, nunee estudantes sira tama sala tuir sira nian hakarak deit, tanba dezde uluk too agora ami nia eskola seidauk iha moru,” nia haktuir.
(jac)
