ZUMALAI, STLTIMORLESTE.com – Eskola Sekundáriu Nobel da Paz too agora seidauk iha moru, maibe too tempu sei halo moru.
Informasaun nee hatoo husi Diretor Eskola Sekundáriu Nobel da Paz, Jeremias P. de Jesus katak, los duni eskola nobel seidauk iha moru, tanba eskola refere halo ona konstrusaun sala de aula, neebe konstrui ho andar.
“Too tempu ida ami sei halo ami nian moru eskola, tanba ami halo ona ami nian sala ho andar, maske ida seluk foin iha andar primeiru, maibe ida halo uluk nee leten hotu ona, ami nian estudantes sira uza ba iha prosesu ensinu aprendizajen, agora moru nee mak depois mak ami halo,” dehan Jeremias ba STL, Segunda nee (15/06/2025).
Tuir Jeremias, eskola ida presiza iha moru para bele halo kontrola neebe mak diak ba estudantes sira, tanba hanesan daudaun nee estudantes balun dader mai tiha eskola, maibe iha liur deit la tama aula, ida nee família presiza fo hanoin ba sira nian oan, oinsa dader mai eskola bele partisipa iha aprendizajen.
“Ami sei haree asuntu atu halo moru eskola nian, tanba agora ami nian sala neebe ami konstrui ona nee andar, depois halo hotu ida nee ami sei haree fali moru eskola nian, neebe mak too agora ami seidauk halo,” nia haktuir.
Nia akresenta, hanesan Diretor husi eskola nee fo hanoin beibeik ba estudantes sira katak, maske eskola nee seidauk iha moru, maibe husu konsiensia estudantes sira nian mai eskola tama aula, labele hamriik fali iha liur parte estrada boot nee ba, tanba sala de aula nee iha nee.
“Hau koalia beibeik ona, maibe ita nian estudantes sira nee la halo tuir, se ita halo ona moru, nee ita haree portaun ida deit, agora seidauk iha moru no estudantes sira nee mai hamriik iha liur, too oras fila sira fila ba uma,” nia akresenta.
Meliana da Costa hanesan estudantes husi Eskola Sekundariu Nobel da Paz hatete, too agora eskola seidauk iha moru, los duni dala ruma estudantes balun mai eskola la tama aula no hamriik deit iha estrada.
“Too agora ami nian eskola seidauk iha moru, los duni dala ruma estudantes balun mai eskola la tama aula no hamriik deit iha estrada,” nia afirma.
(jac)
