DILI, STLTIMORLESTE.com – Komandante Sentru Formasaun Polisia (SFP), Superintendente Xefe Polísia, Arquimino Ramos hatete, estatutu kriasaun Institutu Siensia Polisia (ISP) submete ona ba Gabinete Ministru Interior (MI), hodi hein lori ba Konselhu Ministru atu halao aprovasaun.
Nia dehan, Komisaun Instaladora ba Estabelesimentu Institutu Siensia Polisia molok nee submete ona dokumentu ba kriasaun Instutu Siensia Polisia ba Ministeriu Ensinu Superior Siensia Kultura iha tinan kotuk no Ministeriu Ensinu Superior Siensia Kultura halo ona avaliasaun ba dokumentu referida. Maibe Ministeriu Esinu Superior fo fila dokumentu sira nee ba komisaun instaladora atu kompleta buat balu.
Tanba dokumentu neebe presiza kompleta mak estatutu ba estabesimentu Institutu Siensia Polisia, tanba nee agora komisaun konklui ona estatutu referida no submete ona ba Gabinete Ministru Interior atu halo aprovasaun iha Konselhu Ministru.
“Pedidu lisensiamentu ita hatoo ona ba Ministeriu Ensinu Superior, agora sira fo fila fali dokumentu sira nee para ita atu hadia no ami hadia ona. Estatutu nee ninian esbosu iha ona Gabinete Ministru Interior nian, depois sei lori ba Konselhu Ministru aprova tiha mak ita lori fali ba Ministeriu Ensinu Superior Siensia Kultura para bele hetan lisensa operasional,” Komandante Sentru Formasuan Polisa (SFP), Superintendente Xefe Polísia, Arquimino Ramos ba jornalista sira iha Palasiu Governu, Sesta (07/2/2025).
Nia esplika, estatutu nee antes fulan Julhu bele hetan aprovasaun husi Konselhu Ministru, nunee Komisaun Instaladora Institutu Siensia Polisia bele submete hikas fali dokumentu nee ba Ministeriu Ensinu Superior Siensia Kultura nunee Institutu Siensia Polisia nee bele ona ninian operasaun.
“Data neebe sira fo sai ba ami katak, antes fulan Julhu nee ami tenke aprezenta lisensa ba Ministeriu Ensinu Superior para Institutu Siensia Polisia bele hetan lisensa operasional”, nia informa.
(jen)
