DILI, STLTIMORLESTE.com – Dezenvolvimentu infraestrutura liu-liu kualidade estrada neebe diak, sai nuudar xave prinsipal hodi hamosu kresimentu ekonomiku neebe sustentavel, no aselera sirkulasaun ekonomia iha Timor Leste.
Kestaun nee hatoo husi Observador Ekonomia, Romaldo Guterres relasiona ho progresu kontrusaun, no manutensaun rede infraestrutura nian neebe lao hela iha rai laran.
Tuir Romaldo bainhira Governu tau prioridade hodi hadia kualidade estrada, nee laos deit kria ligasaun fiziku entre Munisipiu, maibe mos foti kbiit sosial no rendimentu povu nian.
“Estrada mak pilar prinsipal ba ekonomia nasaun nian. Bainhira estrada diak, transporte produtu lokal husi foho mai sidade sei lao lais, folin transportasaun tun, no ida nee sei fo lukru boot ba ita nia agrikultor no emprezariu kiik sira,”dehan Romaldo ba STL, iha Kaikoli, Díli, Kuarta (08/07/2026).
Romaldo mos husu ba Governu no Kompahia ezekutador sira hodi garante nafatin kualidade konstrusaun nian neebe mos ho padraun aas, nunee bele dura ba tempu naruk reziste ba kbiit klimatiku iha rai laran.
Iha fatin ketak, Akademista UNTL, Nelson da Costa mos fo analiza klean husi vizaun sientifiku no peskiza nian. Nia rekonhese katak tuir dadus no teoria ekonomia nian, dezenvolvimentu nasional labele hakat ba oin ho lais bainhira setor transportasaun sei sai fali obstakulu boot.
“Husi ami nia perspetiva, investimentu iha kualidade estrada nee hanesan investimentu ho impaktu multiplikador neebe boot tebes. Tanba nee ami prontu atu fo apoiu liuhusi peskiza no estudu viabilidade hodi, nunee projetu infraestrutura sira iha futuru bele bazeia duni ba nesesidade real, no fo retornu ekonomiku neebe boot liu ba Governu,” hatete Romaldo.
Entretantu imajen husi terrenu hatudu katak prosesu kontrusaun estrada estrada foun sira lao hela ho diak, no hein katak infraestrutura neebe modernu liu, dinamika ekonomia iha rai laran mos sei lao ba oin ho lalais liu tan.
(car)
