BAUKAU, STLTIMORLESTE.com – Kondisaun estrada hamutuk kilometru (Km) 272 iha Munisipiu Baukau, kondisaun aat difikulta movimentu ema ho transporte.
Diretor Servisu Obras Publika Munisipiu Baukau, Agostinha Ximenes esplika, dadus estrada rural iha Baukau, ekipa Obras Publiku Munisipal halo ona levantamentu dadus tuir master plan hamutuk 474 km kompeta ona ho kode sira, neebe hahu kedas tinan hirak ba kotuk submete ba Ministeiru no balu halo ona reabilitasaun, enkuantu balun seidauk.
“474 kilometru rezolvidu ona mak 202 km, restu nee seidauk, maibe ami submete ona ba Ministeiru, depois sira mak tetu hodi tau osan,” hateten Agostinho ba STL iha knaar fatin, Kinta (06/02/2025).
Diretor nee sublina, problema infraestrutura liu-liu estrada rural sira iha Munisipiu Baukau neebe balu seidauk halo reabilitasaun, parte Obras Munisipal kontinua relata ba nasional hodi aloka orsamentu, nunee bele halo reabilitasaun fo asesu ba movimentu ema ho transporte lao seguru.
Tanba husi 272 neebe seidauk halo reabilitasaun, iha Postu Administrativu Baukau Vila diresaun Uailili-Uatuwa, Gariuai-Uatuwa, Gariuai-Darsula inklui Kaibada-Uaniuma no fatin seluk tan hanesan iha Postu Administrativu Baguia, Kelikai, Laga, Matebian no Kelikai Antigu, Venilale no Vemasi neebe barak seidauk halo reabilitasaun.
Tanba estrada rural iha Baukau neebe seidauk halo reabilitasaun, husi Orsamentu Jeral Estadu (OJE) 2025 neebe preve ba Ministeiru, parte Ministeriu la aloka hodi minimiza problema estrada rural iha Baukau, maibe iha esperansa sei aloka husi OJE 2026 hodi responde, tanba projetu balu neebe antes nee kontratu kompanhia lokal sira hodi halo reabilitasaun no manutensaun hahu husi tinan 2016 too 2025 fulan Janeiru seidauk remata.
Mak hanesan kompanhia Ruvic Construction Unipessoal Lda neebe responsabiliza estrada rural Fatulia-Uaimori Postu Venilale hamutuk km 10.300 metrus ho valor orsamentu US$ 4,897,636.09, fo kontratu iha tinan 2016 no remata iha tinan 2018, maibe foin atinji progresu fiziku 30.78.
No Kompanhia Lalais Unip. Lda hetan kontratu iha tinan 2019 remata servisu iha tinan 2020 neebe halo manutensaun ba estrada rural Kelikai-Laisorulai Nae hamutuk km 5 ho valor orsamentu US$ 157,601.26, maibe foin atinji progresu fiziku 86.40%.
Nunee mos kompanhia lokal seluk neebe kontratu iha tinan 2021-2022 no 2023 ho durasaun servisu tinan 1, maibe too tinan 2025 Janeiru kontinua seidauk remata implementasaun servisu iha terrenu.
Enkuantu Xefe Suku Afasa, Joaquim Fernandes Ximenes preokupa ho parte kompanhia implementador projetu sira, tanba Governu fo kontratu tinan 1, maibe too ohin loron seidauk remata no kontinua fo impaktu ba movimentu ema ho transporte husi area remotas lori produtu lokal ba merkadu munisipal.
Tanba distansia estrada husi area Dailari Postu Laga too Koribidae Kelikai hamutuk km 23, neebe inisiu husi Dailari too area Samaguia hamutuk km 4.630 metru responsabiliza husi kompanhia Rozi Cons.Unip.Lda no Nautetu Fatima Unip.Lda, maibe kompanhia Nautetu Fatima Unip.Lda abandona servisu iha terrenu. Nunee konsege informa ba Servisu Obras Publika Munisipal hodi foti medida, maibe razaun katak, mudansa klimatika.
Entretantu estrada rural km 272 neebe kondisaun sei aat eziste iha Suku 62, Postu Administrativu 8 iha Munisipiu Baukau.
(EST 2)
