BAUKAU, STLTIMORLESTE.com – Estrada Urbana Baukau Vila husi rotunda Vila Nova besik too areadores merkadu foun fo oportunidade hamosu asidente, tanba kompanhia implementador manutensaun estrada Roman Grigio Unipessoal.Lda seidauk finaliza projetu refere.
Motorista Ijaias de Jesus da Costa hateten, kondisaun estrada urbana Baukau Vila diresaun husi rotunda Vila Nova too area Nagardjo daudaun prejudika ba movimentu transporte publiku no privadu liu-liu tempu bazar loron Kinta no Domingu, tanba kompanhia kee ona husi area rotunda Vila Nova nian too ona merkadu foun, maibe cor deit sorin no sorin husik hela.
Nia sublina, husi estrada neebe kompanhia kee cor sorin no sorin husik hela fo impaktu ba movimentu transporte, tanba motorista ho transporte hadau malu foti estrada neebe parte kompanhia cor ona, enkuantu parte neebe kompanhia kee motorista sira labele utiliza, tanba distansia kee tuun naruk.
“Estrada nee husi kompanhia sira kee tiha ona la halo atividade kompleta, maibe lasu fali transporte sira, tanba ami motorista hadau malu fali dalan diak bele hamosu asidente trafiku, tanba estrada cor sorin deit, sorin husuk hela,” hateten Ijaias ba jornalista sira iha Vila Nova Baukau, Tersa (10/06/2025).
Aleinde nee Habitante Uatulete, Jeremias Magalhães sente triste ho kondisaun estrada urbana refere, tanba parte komapanhia kee ona estrada husi rotunda Vila Nova too ona merkadu foun, maibe cor deit sorin no sorin husik hela.
“Estrada nee asesu ba Hospital no asesu ba merkadu bainhira halo movimentu ema hadau malu mak estrada cor ona nee, entaun bele iha risku ba asidente, tanba nee husu cor tiha kuak sira nee, tanba udan bee nalihun fali iha laran,” hateten Jeremias.
Habitante Uatulete Suku Tirilolo Postu Baukau Vila nee husu parte kompetente liu-liu Obras Publikas Munisipal atu fo atensaun ba kondisaun estrada refere nunee bele fasilita movimentu transporte ho diak.
Tekniku Obras Publikas destakadu Munisipiu Baukau, Mateus R. Freitas hateten, projetu manutensaun estrada urbana Baukau Vila, responsabiliza husi kompanhia Roman Grigio Unipessoal.Lda implementa ho sistema plan (cor ho sumente), Diretor Servisu Munisipal Obras Publikas Baukau hasai despaisu hapara ona, tanba prosesu reabilitasaun estrada urbana hein faze implementasaun.
Maibe parte kompanhia bele halo servisu ateru kuak sira neebe kee ona, nunee bele fasilita movimentu transporte publiku no privadu.
“Cor ita hapara nee tanba planu reabilitasaun, maibe ida sira kee tiha ona nee haruka ateru fali, maibe empreza mak too agora seidauk ateru fali sira kee tiha ona nee,” hateten Mateus.
Liga asuntu nee STL tenta konfirma Diretor kompanhia Roman Grigio Unipessoal.Lda, maibe laiha fatin atu fo komentariu, tanba halao hela servisu balun iha Dili.
Mezmu nunee maibe nota informativa neebe STL asesu kontratu kompanhia refere ho Ministeriu Obras Publikas ba manutensaun estrada termina ona iha loron 01 Junhu nee.
(tom)
