DILI, STLTIMORLESTE.com – Estudante husi eskola iha Munisipiu Dili hamutuk 64.040 asesu ona programa merenda eskolar iha tinan 2025.
Asuntu nee hatoo husi Diretor Servisu Edukasaun Munisipiu Dili, Sabino Perreira ba STL iha nia knaar fatin, Kuarta nee (12/02/2025).
“Ita halo ona abertura iha Ensinu Baziku Sentral Metinaro iha fulan nee, ida nee merenda eskolar hahu lao. Eskola neebe asesu ba merenda eskolar iha Munisipiu Dili hamutuk 138, Ekipa Jestor Programa (EJP) hamutuk 24, nee kobre ba eskola hamutuk 138, nee eskola katoliku, publiku no privadu total estudantes neebe asesu ba merenda eskolar nee hamutuk 64.040 pesoas, ho ninia total orsamentu hamutuk US$ 5.137.288,80. Loron efetivu ba implementasaun merenda eskolar nee 191,” nia dehan.
Sabino dehan, kona-ba menu merenda eskolar nee, EJP sira mak prepara, tanba total osan referida nee inklui ona ho pagamentu ba grupu EJP sira. Eskola balu neebe seidauk nee tanba menu, no EJP balu tuir hela bolsa kandidatu profesores sira nian liu, entaun ekipa EJP nee tenke troka.
“Balu sira rasik husu para atu troka EJP no tau foun, entaun atraza oituan iha ninia implementasaun nee,” nia komenta.
Iha fatin seluk, Koordenador Pre Eskolar Sagrada Familia Vila Verde, Cornelio A. Soares dehan, ema nain ida mak tein ba estudantes sira han, dader estudantes sira han tuku 9:00, menu nee dala ruma estudantes sira han sasoro tau ho naan ka modo tahan, senora, nunee mos estudantes sira han ho aifuan hanesan apel no hudi.
Iha parte seluk, Fernando Soares hanesan Diretor Nasional Edukasaun Inkluzivu Asaun Sosial Eskolar hatete, dala ruma implementa mak la tuir menu neebe mak iha, maibe eskola ninia kondisaun la hanesan, liu-liu ai-haan produtu neebe mak la hanesan, entaun muda menu tuir kondisaun eskola idak-idak, menu nee iha ona, dala ruma ba kompra iha merkadu, ezemplu iha nee ba naan laiha, entaun troka fali menu nee.
(jac)
