DILI, STLTIMORLESTE.com – Estudante sira Eskola Nobel da Paz selu propinas kada fulan ho montante US$ 6 ba estudante ensinu sekundáriu no US$ 5 ba estudante ensinu baziku.
Fundador no Diretór Eskola Nobel da Paz, Jeremias P. de Jesus, hatete ba STL Segunda-feira (26/10/2026) katak, propinas ba estudante ensinu sekundáriu aumenta hosi US$ 5 ba US$ 6, enkuantu propinas ba estudante ensinu baziku aumenta hosi US$ 4 ba US$ 5 kada fulan.
“Uluk estudante ensinu sekundáriu selu propinas US$ 5 kada fulan, maibé agora aumenta ba US$ 6. Ba estudante ensinu baziku, uluk selu US$ 4, agora aumenta ba US$ 5 kada fulan. Tanba ne’e, bainhira atu tuir ezame, estudante sira tenke selu propinas tuir montante ne’ebé determina ona,” nia dehan.
Jeremias esplika katak, nia rasik iha oan na’in tolu ne’ebé estuda iha eskola ne’e. Hosi oan na’in tolu ne’e, na’in rua selu propinas, enkuantu ida seluk hetan edukasaun gratuita.
Nia hatutan katak, eskola fó avizu ba estudante sira atu selu propinas ne’ebé seidauk kompletu antes tuir ezame.
Estudante Lucia Maia hatete katak sira selu propinas kada fulan tuir montante ne’ebé eskola determina, tanba propinas ba ensinu baziku no ensinu sekundáriu la hanesan.
“Kada fulan ami selu propinas tuir montante ne’ebé determina ona, tanba propinas ba ensinu sekundáriu no ensinu baziku la hanesan. Bainhira atu tuir ezame, eskola fó avizu ba estudante sira atu selu propinas,” nia informa.
Estudante seluk, Fernando Barreto mós hatete katak, estudante sira tenke selu propinas kada fulan, tanba sira kontinua mai eskola atu aprende no simu matéria hosi profesór sira.
Nia konsidera katak, selu propinas kada fulan sai obrigasaun ba estudante sira ne’ebé tuir prosesu aprendizajen iha eskola ne’e.
(jac)
