DILI, STLTIMORLESTE.com – Estudantes husi Eskola ESTV-IT 28 de Novembro Becora-Díli, laiha ezame segundu periodu, maibe ezame modulares lao nafatin, depende ba kada profesores.
Informasaun nee hatoo husi Diretor Eskola ESTV-IT 28 de Novembro Becora-Díli, Tomas Pinto ba STL iha nia knaar fatin, Sesta nee (03/07/2026).
“Relasiona ho ezame segundu periode ou segundu trimestrál ba ESTV la iha ezame, maibe ezame modulares lao nafatin depende kada profesores materia neebe kuandu modulo hotu bele fó ezame direita, maibe ami mós iha planu nafatin lao tuir ezame modulares hamutuk ho estudantes sira husi Ensinu Sekundáriu Jeral, neebe ami la forma komisaun ida,” nia esplika.
Tomas hatete, daudaun nee total estudantes neebe sei tuir ezame modulares nee hamutuk 335 pesoas, husi mumeru ida nee kompostu husi departementu haat mak hanesan arte grafika, eletronika, eletrisidade no informatika, kada loron estudantes sira ativu iha prosesu ensinu aprendizajen husi profesores sira.
“Ami nian profesores ba area produtivu sira nee, durante nee sira la partisipa iha formasaun, maibe oinsa mak profesores sira nee partisipa, hodi nunee bele aumenta konhesimentu ba ita nian profesores sira, depois ami nian profesores ba area produtivu nee ba oin presiza aumenta, tanba ami sei menus profesores, ho rekrutamentu neebe halo husi ME nee bele responde ba eskola neebe menus manorin,” katak nia.
Tomas dehan, estudantes sira sempre halo pratika, tanba iha departamentu haat neebe dadaun nee eziste hela iha sira nian eskola, neebe mak ohin mensiona, nee duni estudantes sira laos simu deit teoria, maibe sira halao pratika, nee importante tebes.
Iha fatin ketak, Cosme Maia Nunes hanesan estudante hatete, sira partisipa deit iha ezame modular, maske estudantes balun husi sekundariu jeral nee sira tuir ezame segundu periodu, maibe tekvo nee laiha ezame segundu periodu, hanesan estudante nafatin labele hein too ezame mak estuda, loron baibain mos tenke estuda para bele hatoman aan diak liu tan.
“Ami sei partisipa deit iha ezame modular, maske estudantes balun husi sekundariu jeral, nee sira tuir ezame segundu periodu, maibe tekvo nee laiha ezame segundu periodu, hanesan estudante estuda nafatin, labele hein too ezame mak estuda, loron baibain mos tenke estuda para bele hatoman aan diak liu tan,” nia komenta.
Cosme dehan, eskola tekvo nee estudantes sira laos simu deit teoria, maibe iha mos pratika, rua nee tenke kompleta malu, bainhira simu tiha teoria, nee estudantes sira sei partisipa fali iha pratika nian.
(jen)
