DILI, STLTIMORLESTE.com – Estudantes rihun ida resin husi Eskola Sekundariu Jeral FINANTIL sei partisipa iha ezame segundu periodu, neebe mak tuir kalendariu sei halao iha loron 13 fulan Julhu tinan nee.
Lia hirak nee hatoo husi Diretor Eskola Sekundáriu Jeral FINANTIL, Aniceto Berlelo ba jornalista sira iha nia knaar fatin Aimutin, Kinta nee (02/07/2026).
“Konaba ezame segundu periodu nian nee ami kria tiha ona komisaun organizadora, pontus ezame nian nee ita elabora no hatama daudaun ona, nee duni ita nian profesores sira elabora hotu ona pontus ezame segundu periodu nian hodi bele hatama daudaun ona, tanba tuir planu nee ezame refere sei halao iha loron 13 fulan Julhu tinan nee, estudantes sira hahu ezame ona,” dehan nia.
Nia dehan, pontus ezame nee balun horiseik profesores sira hatama daudaun ona, total estudantes neebe sei partisipa iha ezame segundu periodu ninia nee hamutuk rihun ida resin, nee hahu husi klase primeiru, segundu no terseiru ninia, oinsa husu sira atu bele estuda.
“Tuir kalendariu nee estudantes sira sei halao ezame segundu periodu nee iha loron 13 fulan Julhu, fasilidade hanesan surat tahan no seluk tan neebe mak atu uza ba ezame ninia nee sufisiente hela, konsesaun eskolar ba segundu periodu ninia nee too agora sira seidauk hetan osan ida nee,” nia esplika.
Nia dehan, konaba konstrusaun edifisiu eskola FINANTIL nee mos too agora seidauk halao, maske dehan aprova tiha ona, maibe ninia konstrusaun nee rasik too agora seidauk lao, tanba too ohin loron ekipa ida seidauk ba koalia konaba asuntu nee ho parte eskola ninia, nee duni too agora seidauk iha informasaun.
“Dehan orsamentu nee aprova tiha ona iha parlamentu, maibe too agora ami nian konstrusaun nee seidauk lao. Dezafiu hirak neebe ami hasoru mak konaba fasilidade no sala de aula sira nee, tanba ami nian sala balun aat tiha ona, liu-liu ba ita nian estudantes neebe sei partisipa iha ezame nasional ninia, kona-ba livrus no kaderneta eskolar sira nee diak hotu, ami nian sala de aula balun mak la diak ona, maibe ita atu halo nusa,” katak nia.
Nia esplika, kondisaun sala balun atu monu ona, maibe laiha buat ida, tanba ida nee mak kondisaun sala neebe estudantes sira durante nee uza ba ensinu aprendizajen, daudaun nee total sala 18, maibe husi eskola hein deit, bainhira mak konstrusaun eskola ida nee bele lao ona, sala hirak nee aat dadaun ona.
“Ita nian ezame segundu periodu nee ita sei halao iha loron Segunda, 13 fulan nee, tanba nee ita nian pontus ezame profesores sira hatama ona, atu nunee hein loron ezame nee ita halao deit ona,” nia esplika.
Nunee mos.Natalino Mendes dos Reis hanesan estudante hatete, nuudar estudante presiza prepara aan estuda, tanba tempu besik sira sei halao ezame segundu periodu, liu husi estuda mak buat hotu fasil iha ezame, durante nee profesores sira halao aprendizajen kada loron diak hanesan baibain.
(jac)
