DILI, STLTIMORLESTE.com – Estudantes husi Ensinu Baziku Central (EBC) Manleuana halao atividades desportu iha sira nian eskola.
Lia hirak nee hatoo husi Gabinete Apoiu Tekniku (GAT), EBC Manleuana, Narcisio P. S. V. da Costa ba STL iha nia knaar fatin, Tersa nee (21/07/2026).
“Agora daudaun ami nian estudantes sira halo atividades desportu nian iha ami nian eskola, hau hanoin ami nian atividades refere halao hahu husi loron Segunda nee no remata iha Sabadu agora, jogu neebe mak halao husi ami nian estudantes sira mak hanesan jogu basketball, Futsal no Volly, tanba ita nian estudantes ida-idak ho talentu ba desportu neebe mak iha ona,” dehan nia.
GAT EBC Manleuana nee dehan, merenda eskolar para iha dia 20 Julhu nee no kontinua implementa fali iha dia 3 Agostu nee, estudantes sira semana ida nia laran nee kontinua halo jogu iha eskola deit, atividades desportu nee partisipa husi estudante feto no mane, maibe estudantes husi sentral deit no eskola fillial sira halo iha sira nia eskola deit.
“Atividades desportiva nee laos ita nian estudantes mane deit mak halao atividades ida nee, maibe feto mos hola parte hotu iha ami nian atividades desportu ida nee, tanba ita nian estudantes sira tantu feto ho mane sempre iha talentu neebe mak diak ba iha atividades desportu ninia,” nia informa
(jac)
