DILI, STLTIMORLESTE.com – Estudantes husi Ensiu Baziku Filial (EBF) Marinir provizoriu sei transfere ba Ensinu Baziku Central (EBC) 30 de Agosto, tanba eskola refere kona alargamentu kampu aviasaun.
Lia hirak nee hatoo husi Superintendente Edukasaun Munisípiu Dili, Cesarina C. Guterres ba STL iha nia knaar fatin, Segunda nee (27/07/2026).
“Relasiona eskola EBF Marinir, los duni oras nee daudaun kona alargamentu kampu aviasaun no agora tantu material, manorin, no manorin sira hotu transfere ona mai iha EBC 30 de Agosto tanba sira agrupamentu ho eskola EBC 30 de Agosto. Agora eskola feriadu maibe segunda dia 4-8-2026 eskola tama fali eskola refere nia prosesu ensinu aprendizajen lao ona iha eskola EBC 30 de Agosto,” nia dehan.
Nia dehan, total manorin hamutuk 491, husi numeru ida nee kompostu husi mane 240 no feto 251, tanba agora daudaun estudantes sira bainhira ezame segundu periodu hotu sira tama kedas feriadu, maibe bainhira estudantes sira tama fali eskola, nee sira sei halao aula normal nee iha EBC 30 de Agosto.
“Ita nian EBF Marinir nee kona alargamentu, nunee ita nian estudantes no profesor sira husi eskola refere tenke transfere fali ba iha Eskola Baziku Central 30 de Agosto, nunee ita nian estudantes husi eskola refere partisipa aprendizajen husi ita nian Eskola Baziku Central 30 de Agosto,” nia dehan.
Nia dehan, total manorin iha EBF Marinir hamutuk 20, husi numeru ida nee kompostu husi mane 4 no feto 16, maibe manorin neebe mak ativa nee hamutuk nain 18, no nain 2 moras prolongada, tanba nee provizoriamente estudantes husi EBF Marinir sira mai eskola iha EBC 30 de Agosto tanba eskola refere agrupamentu husi EBC 30 de Agosto.
Iha fatin seluk, Koordenador Ensinu Baziku Filial (EBF) Marinir, Aureliano Maia dehan, estudante sira agora daudaun sei feriadu hela, tanba depois de halo avaliasaun, nee estudantes sira feriadu kedas, no dia 3 de Agosto mak estudantes sira tama eskola iha Eskola EBC 30 de Agosto.
“Ita nian estudante sira agora daudaun sei feriadu hela, tanba depois de halo avaliasaun, nee estudantes sira feriadu kedas, no dia 3 de Agosto mak estudantes sira tama eskola iha Eskola EBC 30 de Agosto,” nia informa.
(jac)
